Qoraqalpog`istondagi maktab direktoriga “Prezident sovg`asi” — “Spark” avtomobili sovg`a qilindi(foto)

Qoraqalpog`iston Respublikasi Qo`ng`irot tumanidagi 39-umumta`lim maktabi o`quvchilari axborot texnologiyalaridan foydalanib, dasturlash bo`yicha yuqori ko`rsatkich qayd etgani uchun maktab direktori Seitkamol Eshmuratov «Bir million dasturchi» loyihasi doirasida Prezident sovg`asi «Spark» avtomobili bilan taqdirlangan.Bu haqda Xalq ta`limi va`zirligi Axborot xizmati xabar berdi.

Ma`lum qilinishicha, maktabning bir guruh pedagoglari “Bir million dasturchilar” loyihasi bo`yicha erishgan yutuqlari uchun Qoraqalpog`iston Respublikasi Xalq ta`limi vazirligining “Xalq ta`limi a`lochisi” ko`krak nishoni va Xalq ta`limi vazirligining Faxriy yorlig`i hamda zamonaviy noutbuklari bilan taqdirlangan.  

Hozirgi kunga qadar Qoraqalpog`iston Respublikasida «Bir million dasturchi» loyihasi doirasida 25 mingdan ortiq o`quvchilar ro`yxatdan o`tib, zamonaviy dasturlash yo`nalishlarini o`rganishmoqda, 10 162 nafar bitiruvchi sertifikatlarni qo`lga kiritgan. Shundan Qo`ng`irot tumanidagi 39-son maktabida tahsil olayotgan 1 074 nafar o`quvchining 820 nafar (76 foiz) bitiruvchisi sertifikatga ega.

Ta`kidlash joizki, ayni paytda Qoraqalpog`iston Respublikasida jami 727 ta umumta`lim maktabi faoliyat yuritadi. Hozirda 416 ta maktab zamonaviy kompyuter texnikasi bilan ta`minlangan, 642 ta (88%) umumta`lim maktablariga optik tola tortilgan va 563 tasi internetga ulangan.