Jizzax shahridagi 18-maktab 1910 yilda tashkil etilgan bo`lib, muassasa binosi oxirgi 50 yil oralig`ida mukammal ta`mirga tushmagan.
Maktab binosining eskiligi, o`quvchi o`rinlarining etishmasligi, moddiy-texnika bazasining zamon talablariga javob bermasligi ta`lim sifatiga o`z ta`sirini ko`rsatmasdan qolmayotgandi.
Endi esa 18-maktab o`quvchilari bunday noqulay sharoitda emas, homiylik asosida barpo etilgan 640 o`rinli zamonaviy maktab binosida ta`lim-tarbiya olishadi, deb XTV xabar bermoqda.
17 aprel kuni ushbu yangi maktabning ochilish marosimi bo`lib o`tdi.
Tadbirda so`zga chiqqan Xalq ta`limi vaziri Sherzod Shermatov, Jizzax viloyati hokimi Ergash Soliev va boshqalar davlatimiz tomonidan xalq ta`limi sohasini rivojlantirish bo`yicha amalga oshirilayotgan keng ko`lamli islohotlarni alohida e`tirof etdi. Bunday e`tibor xalqimiz va tadbirkorlarimizga kuch-g`ayrat bag`ishlab, yoshlar taqdiriga daxldorlikni chuqur his etayotgani natijasida ular ham tizim rivojiga munosib hissa qo`shayotganini ta`kidlashdi.
Darhaqiqat, 925 nafar o`quvchi ta`lim-tarbiya olayotgan ushbu yangi maktab binosining barpo etilishida maktabning sobiq bitiruvchisi, tadbirkor, "Do`stlik" ordeni sohibi Garik Badalyan tashabbus ko`rsatdi.
15 milliard mablag` evaziga o`quvchilarning puxta bilim olishi, intellektual salohiyatini oshirish, barkamol qilib tarbiyalash uchun barcha sharoitlar yaratildi.
5 qavatli 640 o`quvchi o`rniga ega maktabda 35 ta o`quv va laboratoriya xonalari mavjud. 1 ta sport zal, 3 ta ochiq sport maydoni, 120 o`rinli kutubxona hamda 180 o`rinli faollar zali o`quvchi yoshlar ixtiyoriga topshirildi.
O`quvchilarning bo`sh vaqtini mazmunli tashkil qilish, ularni kasb-hunarlarga yo`naltirish, chuqur bilim olishiga yo`naltirilgan o`nlab ta`lim, sport, san`at, hunarmandchilik yo`nalishlaridagi to`garaklar faoliyati uchun sharoit yaratildi.
Xalq ta`limi vaziri mana shunday ulug` kunlarda xayrli ishlarga bosh bo`lib, maktab qurib bergan homiylarga minnatdorlik bildirdi.
Sovg`a tariqasida maktab kutubxonasiga kitoblar jamlanmasi topshirildi.