Жиззах шаҳридаги 18-мактаб 1910 йилда ташкил этилган бўлиб, муассаса биноси охирги 50 йил оралиғида мукаммал таъмирга тушмаган.
Мактаб биносининг эскилиги, ўқувчи ўринларининг етишмаслиги, моддий-техника базасининг замон талабларига жавоб бермаслиги таълим сифатига ўз таъсирини кўрсатмасдан қолмаётганди.
Энди эса 18-мактаб ўқувчилари бундай ноқулай шароитда эмас, ҳомийлик асосида барпо этилган 640 ўринли замонавий мактаб биносида таълим-тарбия олишади, деб ХТВ хабар бермоқда.
17 апрель куни ушбу янги мактабнинг очилиш маросими бўлиб ўтди.
Тадбирда сўзга чиққан Халқ таълими вазири Шерзод Шерматов, Жиззах вилояти ҳокими Эргаш Солиев ва бошқалар давлатимиз томонидан халқ таълими соҳасини ривожлантириш бўйича амалга оширилаётган кенг кўламли ислоҳотларни алоҳида эътироф этди. Бундай эътибор халқимиз ва тадбиркорларимизга куч-ғайрат бағишлаб, ёшлар тақдирига дахлдорликни чуқур ҳис этаётгани натижасида улар ҳам тизим ривожига муносиб ҳисса қўшаётганини таъкидлашди.
Дарҳақиқат, 925 нафар ўқувчи таълим-тарбия олаётган ушбу янги мактаб биносининг барпо этилишида мактабнинг собиқ битирувчиси, тадбиркор, "Дўстлик" ордени соҳиби Гарик Бадалян ташаббус кўрсатди.
15 миллиард маблағ эвазига ўқувчиларнинг пухта билим олиши, интеллектуал салоҳиятини ошириш, баркамол қилиб тарбиялаш учун барча шароитлар яратилди.
5 қаватли 640 ўқувчи ўрнига эга мактабда 35 та ўқув ва лаборатория хоналари мавжуд. 1 та спорт зал, 3 та очиқ спорт майдони, 120 ўринли кутубхона ҳамда 180 ўринли фаоллар зали ўқувчи ёшлар ихтиёрига топширилди.
Ўқувчиларнинг бўш вақтини мазмунли ташкил қилиш, уларни касб-ҳунарларга йўналтириш, чуқур билим олишига йўналтирилган ўнлаб таълим, спорт, санъат, ҳунармандчилик йўналишларидаги тўгараклар фаолияти учун шароит яратилди.
Халқ таълими вазири мана шундай улуғ кунларда хайрли ишларга бош бўлиб, мактаб қуриб берган ҳомийларга миннатдорлик билдирди.
Совға тариқасида мактаб кутубхонасига китоблар жамланмаси топширилди.
