Bugun, 19 aprel sanasida Sudyalar oliy kengashi huzuridagi Sudyalar oliy maktabi “Sudya daxlsizligi va so`z erkinligi: muammo va echimlar” mavzuidaseminar-trening bo`lib o`tdi. Bu haqda Sudyalar oliy kengashi matbuot kotibi Tursunali Akbarov xabar qildi.
Sudyalar oliy kengashi AQSh Xalqaro taraqqiyot agentligi (USAID) hamda BMT Taraqqiyot dasturining “O`zbekistonda qonun ustuvorligi yo`lida hamkorlik” qo`shma loyihasi bilan hamkorlikda tashkil etilgan mazkur tadbirdan bugunning dolzarb mavzusi – sud daxlsizligi va so`z erkinligi xususida so`z yuritildi. Ya`ni, erkin fuqarolik jamiyatida sudyaning daxlsizligi qanchalar muhim bo`lsa, so`z erkinligining ahamiyati ham undan kam emas.
Albatta, har tizimning faoliyati qonun bilan tartibga solingan. Biroq jamiyatda ochiqlik va shaffoflik, ayniqsa, so`z erkinligi kabi na`matlar tobora o`z aksini topayotgan bugungi kunda ayrim muammo va tushunmovchiliklar yuzaga kelayotgani ham bor gap. Bunday holatlar ommaviy axborot vositalari va ijtimoiy tarmoqlar orqali bildirilayotgan turli fikrlarda ayniqsa yaqqol namoyon bo`lmoqda. Bu esa o`z-o`zidan yosh sudyalarda jamoatchilik bilan ishlash ko`nikmalari yaxshi shakllangan bo`lishini taqozo etadi.
Tadbir ishtirokchilari ilk marta sudyalik lavozimiga tayinlanganlar ekani e`tiboridan ularda muloqot madaniyatini oshirish, turli tarang vaziyatlardan chiqish ko`rinkmalarini shakllantirish lozimligi o`z-o`zidan ma`lum. Tajribali psixolog Shoira Isoqovaning ayni shu mavzudagi qiziqarli chiqishi ishtirokchilarda katta taassurot qoldirdi.
Shuningdek, Djordjiya universitetining (AQSh) jurnalistika va huquqshunoslik bo`yicha dosenti, "Columbia Journalism Review" jurnalining matbuot erkinligi bo`yicha eksperti Djonatan Piters (Jonathan Peters) bilan «Sudyalar va sud xodimlari ijtimoiy tarmoqlardan qanday unumli foydalanishlari mumkin: AQSh tajribasi misolida» mavzusida onlayn muloqot o`tkazildi.
Mavzu yuzasidan berilgan savollarga mahalliy va xorijlik mutaxassislar tomonidan atroflicha javob berildi.
