Samarqandda bir nechta ayollarni fohishalik qilishga majbur qilgan va ana shu jirkanch ish orqali moddiy boylik orttirmoqchi bo`lgan jinoiy guruh qo`lga olindi.
Jinoiy guruh tarkibida 6 ayol va 1 erkak bo`lgan. Ular puxta reja asosida jinoyatlarini amalga oshirishgan.
Samarqand shaharidagi beshta uy ularning jinoiy rejasini amalga oshiradigan maskan vazifasini o`tagan. Bu uylarda respublikaning turli viloyatlaridan kelgan qizlarni fohishalik bilan shug`ullanishlari uchun ushlab turishgan. Qizlar orasidagi 18 yoshga to`lmaganlari ham fohishalik qilib pul topishga majburlangan.
Asiralarning aytishicha, bir kunda 10-15 nafar "mijoz"ni ko`ngilini olishga majbur qilingan. Qizlarning har birining kunlik "kassa"si 200 mingdan 500 ming so`mgacha etib belgilangan. Pul ishlolmagan qizlar urib-kaltaklangan. Ularning pasportlari olib qo`yilgan. Jinoiy guruh a`zolari qizlarga hamma joyda tanish-bilishlari borligini aytib qo`rqitishgan.
Tutqinlikdagi qizlar 2018 yilning avgust oyidan 2020 yilning oktyabriga qadar majburan ushlab turilgan.
Ayni paytda jinoiy guruh a`zolari sud hukmi bilan qamoqqa olingan.
