Самарқандда бир нечта аёлларни фоҳишалик қилишга мажбур қилган ва ана шу жирканч иш орқали моддий бойлик орттирмоқчи бўлган жиноий гуруҳ қўлга олинди.
Жиноий гуруҳ таркибида 6 аёл ва 1 эркак бўлган. Улар пухта режа асосида жиноятларини амалга оширишган.
Самарқанд шаҳаридаги бешта уй уларнинг жиноий режасини амалга оширадиган маскан вазифасини ўтаган. Бу уйларда республиканинг турли вилоятларидан келган қизларни фоҳишалик билан шуғулланишлари учун ушлаб туришган. Қизлар орасидаги 18 ёшга тўлмаганлари ҳам фоҳишалик қилиб пул топишга мажбурланган.
Асираларнинг айтишича, бир кунда 10-15 нафар "мижоз"ни кўнгилини олишга мажбур қилинган. Қизларнинг ҳар бирининг кунлик "касса"си 200 мингдан 500 минг сўмгача этиб белгиланган. Пул ишлолмаган қизлар уриб-калтакланган. Уларнинг паспортлари олиб қўйилган. Жиноий гуруҳ аъзолари қизларга ҳамма жойда таниш-билишлари борлигини айтиб қўрқитишган.
Тутқинликдаги қизлар 2018 йилнинг август ойидан 2020 йилнинг октябрига қадар мажбуран ушлаб турилган.
Айни пайтда жиноий гуруҳ аъзолари суд ҳукми билан қамоққа олинган.
