Prezidentning “Jamoat xavfsizligini ta`minlash sohasida professional kadrlarni tayyorlash tizimini yanada takomillashtirish chora-tadbirlari to`g`risida”gi qaroriga asosan, Milliy gvardiya Harbiy-texnik instituti Jamoat xavfsizligi universiteti etib qayta tashkil etildi. Bu haqda Darakchi.uz muxbiri Dilbar Abdunabieva xabar berdi.
Universitet mutasaddilarining aytishicha, qabul jarayonlari 1 fevraldan boshlanib, 1 aprelgacha davom etgan.
Nomzodni tibbiy ko`rikdan o`tkazish — tuman mudofaa ishlari bo`limlaridagi tibbiy komissiya tomonidan o`tkaziladi. Tibbiy ko`rikda yaroqli deb topilgan nomzodlar keyingi bosqichda individual-psixologik va umumjismoniy sinovlarga qo`yiladi.
Shundan so`ng yakuniy tibbiy ko`riklar tashkil etiladi. Ana shu ko`rikdan o`tgan nomzodlar test sinovlariga qo`yiladi. Test sinovlaridan muvaffiqiyatli o`tganlar universitetga qabul qilinadi.
Universitet bir qancha yo`nalishlar uchun kadrlar tayyorlaydi. Xususan:
- IIV va Milliy gvardiya uchun — jamoat tartibini, yo`l harakati xavfsizligi va pasport tizimi talablarini amalga oshirish;
- Qurolli Kuchlar va huquqni muhofaza qiluvchi organlar uchun — harbiy diplomatiya, yurisprudensiya va iqtisodiyot hamda muhandislik-texnik, tarbiyaviy-psixologik va qo`mondonlik-taktik faoliyat sohasida;
- qo`riqlash tuzilmalariga ega organlar uchun — qo`riqlash sohasining barcha yo`nalishlarida.
2021/2022 o`quv yilidan universitetda bakalavriat va magistratura tizimi joriy etiladi.
Universitetning asosiy vazifasi- jamoat xavfsizligini ta`minlash doirasida ixtisoslik va huquqshunoslik yo`nalishlari bo`yicha kursandarni chuqurlashtirilib o`qitishdan iborat.
