Joriy yilning 10 may kuni soat 21:46da Ohangaron tumani “Oybuloq” MFYdan o`tuvchi A-373 “Toshkent-O`sh”, “Olmaliq-Toshkent” avtomobil yo`lining kesishmasida “MAN TGS” rusumli yuk mashinasi, “Lacetti” rusumli engil avtomobil va “Kamaz” rusumli yuk mashinasi ishtirokida yo`l transport hodisasi sodir bo`lgan. Bu haqda Favqulotda vaziyatlar vazirligi xabar berdi.
YTH natijasida yong`in kelib chiqib, “Lacetti” va “Kamaz” haydovchilari engil tan jarohati olishgan va ularning boshqaruvidagi avtoulovlar to`liq yong`indan zararlangan.
Hodisa joyiga Ohangaron tuman FVBning 4 ta yong`in-qutqaruv guruhlari 21:56da etib borgan. Yong`in 21:58da qurshab olinib, 22:08da to`liq bartaraf etilgan.
