Shavkat Mirziyoev Paxtaobod tumanidagi innovasion issiqxonalar faoliyati bilan tanishdi (foto)

Prezident Shavkat Mirziyoev ayni paytda hududlardagi o`zgarishlar, aholi hayoti bilan yaqindan tanishish maqsadida Andijon viloyatiga uchib ketgani haqida xabar bergan edik. Prezident Matbuot xizmatining xabar berishicha, davlatimiz rahbari Andijon viloyati Paxtaobod tumanidagi innovasion issiqxonani ko`zdan kechirdi.

Innovasionligi shundaki, bu joy ilgari tosh-shag`al kareri bo`lgan. Erdan unumli foydalanish siyosati natijasida u ekinzorga aylantirildi. «Mega agro» mas`uliyati cheklangan jamiyati bu erda Ispaniya texnologiyasi asosida issiqxona barpo etdi.

Bu texnologiyada ekin polietilen quvurchalar orqali sug`oriladi. Eng muhimi, suv isrof bo`lmaydi, doimiy aylanib turadi.

Tadbirkor uchun 16 gektar er ajratilgan. Shundan 6 gektarida ochiq va yopiq issiqxona tashkil etilgan. Yana 2 gektarda Turkiya va Ispaniyadan olib kelingan zamonaviy uskunalar o`rnatilmoqda.

Issiqxonalarda «Aysberg» karami, pomidor, bodring, ularning ko`chatlari va har xil ko`katlar etishtiriladi. Ularni yurtimiz bozorlariga etkazib berish, shuningdek, yiliga 1 million 500 ming dollarlik eksport qilish rejalashtirilgan. Korxonada 100 ta ish o`rni yaratilgan.

Davlatimiz rahbari Andijonda metall konstruksiyalar korxonasi tashkil etib, chetdan sotib olinayotgan materiallarni mahalliylashtirish, xususan, issiqxona detallarini ishlab chiqarish bo`yicha topshiriq berdi. Andijon qishloq xo`jaligi instituti viloyatda agrar sohani innovasion rivojlantirishga akselerator bo`lishi kerakligi ta`kidlandi.