Navoiy viloyatida Xitoy tomonidan koronavirusga qarshi vositalar ishlab chiqariladigan zavod quriladi. Bu haqda viloyat hokimligi axborot xizmati xabar berdi.
Ma`lum qilinishicha, 23 iyun kuni Innovasion rivojlanish vaziri Ibrohim Abdurahmonov Xitoy Fanlar akademiyasi Sinszyan Fizika va kimyo texnika instituti vakillari bilan muzokaralar o`tkazgan. Uchrashuv davomida Navoiy viloyatida dorivor moddalarni sintez qilish zavodini tashkil etish loyihasini amalga oshirish bo`yicha fikr almashilgan.
Qayd etilishicha, ikki mamlakatning Fanlar akademiyalari o`rtasida Navoiy viloyatida dorivor moddalarni sintez qilish zavodini tashkil etish bo`yicha kelishuv imzolangan. Unga asosan, Xitoy tomoni 10 million AQSh dollari miqdorida sarmoya kiritishi kelishilgan. Shuningdek, zavod yo`lga qo`yilgach yiliga 36,3 million AQSh dollariga teng bo`lgan dori vositalari uchun tabiiy va kimyoviy moddalar, koronavirusga qarshi vositalar ishlab chiqarish rejalashtirilgan.
Hozirda korxonani tegishli idoralarda ro`yxatdan o`tkazish va erkin iqtisodiy hududga a`zolik masalalari bo`yicha hujjatlar ishlab chiqilmoqda.
