Tashqi ishlar vazirligi Afg`onistonda keskinlik kuchayib borayotganidan mamlakat xavotirda ekanligini bildirib, rasmiy bayonot berdi.
Ma`lum qilinishicha, 27 iyun kuni 44 kishidan iborat Afg`oniston chegara qo`shinlari va mahalliy qurolli guruh vakillari Sho`rtepa tumani hududida O`zbekistonning davlat chegarasini buzgan.
26 iyun kuni chegaraning ushbu qismida afg`on kuch ishlatar tizimlari 3 nafar vakili O`zbekiston hududiga kirib kelgan. Barcha Afg`oniston fuqarolari o`z vataniga qaytarilgan.
«O`zbekiston hududiga bu kabi noqonuniy o`tishga urinishlar qat`iy ravishda bartaraf etiladi», — deyiladi xabarda.
«O`zbekiston hukumati Afg`oniston bilan an`anaviy do`stona va yaxshi qo`shnichilik munosabatlarini davom ettirish, neytralitetni saqlash hamda qo`shni mamlakat ichki ishlariga aralashmaslik tarafdori ekanligini qat`iy ma`lum qiladi», — deyiladi TIV bayonotida.
Eslatib o`tamiz, avvalroq, 23 iyun kuni 53 nafar afg`on chegara qo`shinlari harbiy xizmatchilari va mahalliy qurolli guruhlar Sho`rtepa tumani hududidan O`zbekistonga o`tgani xabar qilingan edi.
