"O`tkazishga joyi yo`q, lekin ko`ngli keng. Shu erda onasi bilan yashaydi, ovqatlanadi, ishlab pul topadi. Pianinosi tikuv materiallariga shkaf vazifasini o`taydi. Bir qaraganda "hech narsam yo`q" deyishga hamma asosi bor. Bir qaraganda "hammadan baxtliman" deyishga o`nlab sabab aytadi. Qat`iyatli qiz Aziza", degan edi "Mikrofon ko`targan ayol".
Irodasi mustahkam Aziza
Sergeli tumanida kichkinagina bir qizcha bor edi. Bostirmadek uyda katta orzulari bilan yashardi. Yolg`iz onasi Adolat opa Aziza uchun hamma narsada kuydi-pishdi bo`ldi. Lekin, osmon yiroq, er qattiq. Tirikchilik uchun ona-bola birga tashlandiq joylarda dehqonchilik ham qilishdi, bir-ikki so`m bo`lar deb terak ekishdi, yillab uning daraxt bo`lishini kutishdi.
Daraxtlar to`sindek bo`lganida kimlardir ularni kesib ham ketdi. Oilaning boshida erkak kishi, otasi bo`lmagani uchun Aziza va onasi ko`p bor boshlagan ishlarida pand eyishdi, ayrimlar aldadi. Orada tikuvchilik ham qilishdi. Qanday qilib deng? Ona-bola nima eyishsa, sotib olishsa, deylik, bir bo`lak kolbasa sotib olib eyishsa ham, yorlig`idagi telefon raqamlarni yozib olishar, keyin o`sha zavodning raqamiga qo`ng`iroq qilib "sizga spesovka kiyimlar kerakmasmi, ishchilarizga tikib beramiz" deb so`rashardi. Buyurtmalar olib maxsus ishchi kiyimlarini tikib, tirikchilik qilishdi.
Aziza bo`y etgan qiz. Samimiy, dilidagi tilida. Onasi qachon boshimizga uy bitarkin, sovchini qaerda kutaman, qizimni qanday uzataman, deb joni halak yurardi. "Yoshlar daftari" haqidagi xabarni ham onasi mahalladan topib keldi. Aziza tadbirkorlik boshlayman deb 3 ta zamonaviy tikuv mashinasini sotib olish uchun 36 million so`m kredit oldi. Endi 3 kishi ishlab buyurtmalarni tikishni boshlashdi. Uning orzulari va fikrlari haqdagi videorolik kutilmaganda davlat rahbari e`tiboriga tushdi. Buyog`i endi tushga o`xshab ketdi...Hamma uchun...
Bugun Shavkat Mirziyoev nomidan Aziza Samig`ova nomiga maktub keldi. Uni davlat rahbari matbuot kotibi Sherzod Asadov o`qib eshittirdi. Maktubda Prezident Azizaning hayotning turli sinovlarida ham kelajakka qat`iy ishonch va umid bilan qarayotgani, yosh tadbirkor sifatida boshqalarga o`rnak ekanini aytib o`tgan: "...Taqdirning har bir sinovida albatta hikmat bor. Hayot qiyinchiliklari insonni yanada kuchli qiladi. Shubhasiz bu sinovli kunlar ham o`tmishga aylanadi. Shuni bilingki, siz hech qachon yolg`iz emassiz. Sizning timsolingizda barcha shijoatli o`g`il-qizlarimizning maqsadlari amalga oshishi uchun doimo yordam qo`lini cho`zamiz."
Davlat rahbari o`z maktubida Aziza va uning onasiga Sirg`ali tumanidan 3 xonali uy berilishini ma`lum qildi, Tadbirkorlik qilayotgan pastqamgina yashash joyi ta`mirlanib sexga aylantiriladigan bo`ldi. Azizaning hikoyasi mana endi boshlanayotganga o`xshaydi. Bu endi boshqa, baxt hikoyasi bo`ladi.
