2021 yil 27 iyun kuni soat 14:30larda Konimex tumani hududidan o`tgan A-379 “Navoiy-Uchquduq-Zarafshon” xalqaro ahamiyatga ega avtomobil yo`lida ayanchli YTH sodir bo`ldi. Bu haqda Navoiy viloyati IIB Axborot xizmati xabar bermoqa.
Ma`lum bo`lishicha, 1966 yilda tug`ilgan Zarafshon shahrida yashovchi fuqaro O`.Q. o`ziga tegishli bo`lgan “Kobalt” rusumli avtomashinasini “Toshkent-Zarafshon” yo`nalishi bo`yicha boshqarib borib, ushbu yo`lning 94-95 kilometrlari oralig`iga kelgan vaqtida charchoq oqibatida rulda uxlab qoladi va rul boshqaruvni yo`qotgan. Natijada o`zining yo`nalishi bo`yicha qarama-qarshi yo`ldan harakatlanib kelayotgan 1995 yilda tug`ilgan Samarqand viloyatida yashovchi fuqaro A.K. boshqaruvida bo`lgan Navoiy shahrida joylashgan “Berejlivost” MChJga tegishli “HOWO SINOTROC” rusumli maxsus (axlat tashuvchi) avtomashina bilan to`qnashib, yo`l-transport hodisasi sodir etgan. Oqibatda “Kobalt” rusumli avtomashina haydovchisi O`.Q. va avtomashina old o`rindig`ida yo`lovchi sifatida ketayotgan, haydovchining otasi nafaqaxo`r, R.Q.lar olgan og`ir tan jarohatlari tufayli voqea joyida vafot etgan.
“Kobalt” rusumli avtomashina orqa o`rindig`ida yo`lovchi sifatida ketayotgan, haydovchining turmush o`rtog`i Z.Sh. tan jarohati olib, Konimex tuman tibbiyot birlashmasining jonlantirish bo`limiga yotqizilgan.
Mazkur holat yuzasidan Konimex tuman IIB tomonidan dastlabki tergov harakatlari olib borilmoqda.