Turkiyaning O`zbekistondagi elchixonasi “Ipak yo`li” turizm xalqaro universiteti kutubxona fondini turk tilidagi yangi va noyob nashrlar bilan boyitdi. Bu haqda universitet Matbuot xizmati ma`lum qildi.
To`plamda gumanitar va turistik adabiyotlar, mavzuviy lug`atlar mavjud. Kitoblarning asosiy qismi 2018-yildan keyingi nashrlardir. Turizm, badiiy adabiyot va geografiya bo`yicha kitoblar, rang-barang ensiklopediyalar, shuningdek, o`quv adabiyotlarining keng tanlovi mavjud. Shuni ta`kidlash kerakki, sovg`a qilingan kitoblarning aksariyati noyobdir, chunki ular cheklangan adadda nashr etilgan.
Zamonaviy kutubxonaning imkoniyatlari tufayli, u o`z navbatida, bir nechta o`qish zonalariga bo`lingan: elektron resurslar zali, markaziy zal, xalqaro zal, milliy zal, noyob kitoblar zali, shuningdek, "Aqliy hujum" xonasi. Universitet talabalari javondagi kitoblarni ko`rib chiqishlari va kerakli adabiyotlarni tanlashlari, elektron ma`lumotlar bazasida qidiruv o`tkazishlari yoki ma`lum bir ariza asosida xodimlar bilan bog`lanishlari mumkin. Ayni paytda universitetning kutubxona fondida 15 mingdan ortiq bosma nashrlar mavjud, shuningdek, u ikki mingdan ortiq kitoblarning elektron varianti bilan tanishish imkoniyatini beradi.
