Ayni kunlarda Shanxay Hamkorlik Tashkiloti Bosh kotibi V.I.Norov boshchiligidagi delegasiya mamlakatimizda mehmon bo`lib turibdi. Tashrif doirasida qator vazirlik va idora rahbarlari bilan uchrashuvlar tashkil etilishi rejalashtirilgan.
Bu haqda Markaziy saylov komissiyasi matbuot xizmati xabar berdi.
Ma`lum qilinishicha, bugun 8 iyul kuni Bosh kotib saylovga tayyorgarlik jarayonlari bilan tanishish maqsadida Markaziy saylov komissiyasi raisi Z.Nizamxodjaev bilan uchrashdi.
Suhbat avvalida Z.Nizamxodjaev O`zbekiston va ShHT o`rtasidagi ko`p qirrali hamkorlikni, jumladan, O`zbekiston vakillari ShHTning ishtirokchi mamlakatlardagi parlament va prezident saylovlaridagi missiyasida muntazam ishtirok etib kelayotganliklarini yuqori baholab, saylov tizimida amalga oshirilgan islohotlarga alohida to`xtalib o`tdi.
Joriy yilda “Saylov qonunchiligi takomillashtirilishi munosabati bilan O`zbekiston Respublikasining ayrim qonun hujjatlariga o`zgartish va qo`shimchalar kiritish to`g`risida”gi qonun qabul qilinganligi munosabati bilan endilikda saylov komissiyalarining harakatlari va qarorlari ustidan berilgan shikoyatlar faqat sud tomonidan ko`rib chiqilishi, O`zbekiston Respublikasi Prezidenti saylovini o`tkazish bo`yicha okrug saylov komissiyasi a`zolari sonini ko`paytirish, saylov byulleteniga kiritiladigan nomzodlar haqidagi ma`lumotlarni kamaytirish borasidagi qoidalar ham yangi qonunda belgilangan. EXHT DIIHB missiyasining tavsiyalarini inobatga olgan holda ishlab chiqilgan ushbu qoidalar saylovlarning xalqaro standartlar va zamonaviy tendensiyalar asosida o`tishini ta`minlashga xizmat qilishi ta`kidlangan.
Shuningdek, Markaziy saylov komissiyasi raisi Z.Nizamxodjaev Bosh kotib V.Norov va ShHT kuzatuvchilar missiyasini bo`lajak prezident saylovlarida xalqaro kuzatuvchi sifatida ishtirok etishga taklif etgani ma`lum qilindi.
