Ijtimoiy tarmoqlarda "Surxondaryo viloyatida yangi “vorzakon” paydo bo`ldi” sarlavhasi ostidagi videolavha tarqalgani haqida xabar bergan edik.
Surxondaryo viloyati IIB Axborot xizmati holat yuzasidan batafsil ma`lumot berdi.
Videodagi voqea 2021 yilning 26 aprel kuni kunduzi soat 16:30lar atrofida sodir etilgan. Unda o`zini lezviya bilan tilgan kishi 1981 yilda Muzrabot tumanida tug`ilgan, hozirda shu hududdagi “Yangi hayot” mahallasida yashovchi fuqaro M.Abduraxim bo`lib, muqaddam Jinoyat kodeksining 169-moddasi bilan besh marotaba, 277-moddasi bilan 1 marotaba, Rossiya Federasiyasi Jinoyat kodeksining 162-moddasi (bosqinchilik) bilan bir marotaba sudlangani aniqlangan.
Vaqtincha ishsiz bo`lgan M.Abduraxim o`sha kuni tuman IIB binosiga mast holda kelib, sababsiz baqir-chaqir qilib, muqaddam sudlanganligi sababli zarurat tug`ilgan vaqtda tuman IIBga profilaktik suhbatga chaqirtirilayotganligidan norozi ekanligini bildirgan. Shundan so`ng soqol olish uchun mo`ljallangan lezviya bo`lagi bilan o`zining tana qismini bir necha joyidan tilib o`ziga tan jaroxati etkazgan.
Shu sababli tuman IIB TB NQ katta inspektori uning yoniga borib qo`lidagi lezviyani olmosni olmoqchi bo`lganida M.Abduraxim olmosni bo`yiniga olib kelib, “yaqinlashsalaring tomirimni kesaman!”-deb, baqir-chaqirni davom ettirgan.
Shundan so`ng M.Abduraxim bilan tushuntirish ishlari davom ettirilishi natijasida qo`lidagi olmosini otib yuborgan va tez tibbiy yordam chaqirtirilib, unga tez tibbiy yordam ko`rsatilgan.
Holat yuzasidan shu vaqtning o`zida Muzrabot tuman prokuraturasiga xabar qilingan. Mazkur holat shu kuni tuman IIB TB NQ katta inspektori tomonidan tuman IIBning Shakl-2 kitobiga rasmiylashtirilgan. Fuqaro M.Abduraxim hushyor holga kelgach, qilgan ishidan pushaymonligini, pivo ichib mast holatda bo`lganligi sababli o`zining hatti-harakatlarini boshqara olmaganligini ma`lum qilgan.
Mazkur holat yuzasidan tuman IIB HPB profilaktika inspektori tomonidan 2021 yil 5 may kuni O`zbekiston Respublikasi JPKning 83-moddasi 2-bandiga asosan jinoyat ishi qo`zg`atishdan rad etilganligi ma`lum bo`ldi.