Ижтимоий тармоқларда "Сурхондарё вилоятида янги “ворзакон” пайдо бўлди” сарлавҳаси остидаги видеолавҳа тарқалгани ҳақида хабар берган эдик.
Сурхондарё вилояти ИИБ Ахборот хизмати ҳолат юзасидан батафсил маълумот берди.
Видеодаги воқеа 2021 йилнинг 26 апрель куни кундузи соат 16:30лар атрофида содир этилган. Унда ўзини лезвия билан тилган киши 1981 йилда Музработ туманида туғилган, ҳозирда шу ҳудуддаги “Янги ҳаёт” маҳалласида яшовчи фуқаро М.Абдурахим бўлиб, муқаддам Жиноят кодексининг 169-моддаси билан беш маротаба, 277-моддаси билан 1 маротаба, Россия Федерацияси Жиноят кодексининг 162-моддаси (босқинчилик) билан бир маротаба судлангани аниқланган.
Вақтинча ишсиз бўлган М.Абдурахим ўша куни туман ИИБ биносига маст ҳолда келиб, сабабсиз бақир-чақир қилиб, муқаддам судланганлиги сабабли зарурат туғилган вақтда туман ИИБга профилактик суҳбатга чақиртирилаётганлигидан норози эканлигини билдирган. Шундан сўнг соқол олиш учун мўлжалланган лезвия бўлаги билан ўзининг тана қисмини бир неча жойидан тилиб ўзига тан жарохати етказган.
Шу сабабли туман ИИБ ТБ НҚ катта инспектори унинг ёнига бориб қўлидаги лезвияни олмосни олмоқчи бўлганида М.Абдурахим олмосни бўйинига олиб келиб, “яқинлашсаларинг томиримни кесаман!”-деб, бақир-чақирни давом эттирган.
Шундан сўнг М.Абдурахим билан тушунтириш ишлари давом эттирилиши натижасида қўлидаги олмосини отиб юборган ва тез тиббий ёрдам чақиртирилиб, унга тез тиббий ёрдам кўрсатилган.
Ҳолат юзасидан шу вақтнинг ўзида Музработ туман прокуратурасига хабар қилинган. Мазкур ҳолат шу куни туман ИИБ ТБ НҚ катта инспектори томонидан туман ИИБнинг Шакл-2 китобига расмийлаштирилган. Фуқаро М.Абдурахим ҳушёр ҳолга келгач, қилган ишидан пушаймонлигини, пиво ичиб маст ҳолатда бўлганлиги сабабли ўзининг ҳатти-ҳаракатларини бошқара олмаганлигини маълум қилган.
Мазкур ҳолат юзасидан туман ИИБ ҲПБ профилактика инспектори томонидан 2021 йил 5 май куни Ўзбекистон Республикаси ЖПКнинг 83-моддаси 2-бандига асосан жиноят иши қўзғатишдан рад этилганлиги маълум бўлди.
