Bugun, 13 iyul kuni Axborot va ommaviy kommunikasiyalar agentligida Oliy Majlis Qonunchilik palatasi tomonidan “Parlament faoliyati: 2021 yil 6 oylik yakunlari bo`yicha eng muhim natijalar” mavzusida matbuot anjumani o`tkazildi.
O`zbekiston Prezidenti Shavkat Mirziyoev ilgari surgan g`oyalarni hayotga izchil tatbiq etishga, siyosiy partiyalar fraksiyalari va deputatlar faolligini oshirish, ijro hokimiyati organlari faoliyati ustidan parlament nazoratini yanada kuchaytirish, hududlarda aholini o`ylantirib kelayotgan masalalar bo`yicha o`rganishlar o`tkazish hamda qonun loyihalari muhokamasiga keng jamoatchilikni jalb etish bo`yicha ustuvor yo`nalishlarni amalga oshirishga qaratilgan ishlar Qonunchilik palatasi faoliyatini samarali tashkil etish hamda takomillashtirish yo`lida muhim qadam bo`ldi.
Matbuot anjumanida qayd etilishicha, aholi salomatligini mustahkamlash, ushbu sohadagi qonunchilikni amaliyotga samarali tatbiq qilishga ko`maklashish borasida Qonunchilik palatasi tomonidan tizimli ishlar yo`lga qo`yildi.
O`tgan olti oy davomida parlament a`zolarining har oyning oxirgi haftasida o`z saylov okruglariga chiqib, aholi va saylovchilarni o`ylantirayotgan masalalarni tizimli ravishda o`rganib borish amaliyoti izchil davom ettirildi. Xususan, uchrashuvlar davomida deputatlar tomonidan 6 550 ta xonadonga tashrif buyurilib, 4 721 ta uchrashuv o`tkazildi. Ularda 98,6 mingdan ziyod fuqaro, shu jumladan 9 715 dan ortiq tadbirkor bilan bevosita uchrashuv va muloqotlar tashkil etildi hamda 2 946 ta ijtimoiy soha ob`ektining faoliyati bilan tanishildi. Deputatlarning muloqotlari chog`ida saylovchilar tomonidan 11 763 ta masala ko`tarildi, shulardan 4 811 tasi xalq vakillari tomonidan joyida hal etildi. Qolgan muammolar esa nazoratga olindi.
O`tgan olti oy mobaynida 35 ta qonun qabul qilinib, ma`qullash uchun Senatga yuborildi. Shundan 17 ta yangi qonun, 12 ta yaxlit qonun, 3 ta jamlanma (16 ta qonun loyihasini o`z ichiga olgan) qonun hamda 3 ta xalqaro shartnomalar va bitimlarni ratifikasiya qilishni nazarda tutuvchi qonundir.
Qayd etilganidek, Qonunchilik palatasining mamlakatimizda demokratik islohotlarni ro`yobga chiqarish, ijtimoiy-siyosiy o`zgarishlarni huquqiy jihatdan ta`minlash jarayonlarida ishtiroki tobora kengayib bormoqda.
