DXA: 1 yanvardan 16 turdagi hujjat va ma`lumotlarni fuqarolardan talab qilish bekor qilinadi

2022 yil 1 yanvardan quyidagi 16 turdagi hujjat va ma`lumotlarni davlat organlari, xo`jalik birlashmalari, mahalliy ijro etuvchi hokimiyat organlari, davlat tashkilotlari tomonidan aholidan, shu jumladan tadbirkorlik sub`ektlaridan talab qilish bekor qilindi:

a) quyidagi faktlarni tasdiqlovchi ma`lumotlarni:

–tadbirkorlik sub`ekti davlat ro`yxatidan o`tkazilganligi to`g`risidagi guvohnoma ma`lumotlarini;

–lisenziya, ruxsat etish xususiyatiga ega hujjatlar 
– xabarnomalar qabul qilinganligi to`g`risida tasdiqnoma mavjudligi bo`yicha ma`lumotlarni;

– boji, yig`imlar va boshqa to`lovlar to`langanligi to`g`risida ma`lumotlarni;

– qog`ozlar, qimmatli qog`ozlar bilan amalga oshirilgan operasiyalar, dividendlar olinganligi to`g`risida ma`lumotlarni;

– kam ta`minlangan oila yoki oila a`zosi sifatida ro`yxatga olinganligi to`g`risida ma`lumotlarni;

– jismoniy shaxslar tomonidan to`langan va olingan alimentlar to`g`risida ma`lumotlarni;

– oliy ma`lumot to`g`risidagi diplom ma`lumotlarini;

– jismoniy shaxs o`rta maxsus, kasb-hunar ta`limi muassasasini tugatganligi haqida ma`lumotlarni;

– jismoniy shaxs umumiy o`rta ta`lim (11-sinf negizida) muassasasini tugatganligi haqida ma`lumotlarni;

– fuqaro “Yoshlar daftari” yoki “Ayollar daftari”da mavjudligi to`g`risida ma`lumotlarni;

– o`zini o`zi band qilgan shaxslar to`g`risida ma`lumotlarni;

– oliy ta`lim muassasalariga o`qishga kirish uchun imtiyozga ega bo`lgan abiturientlarning imtiyoz huquqini tasdiqlovchi hujjat to`g`risida ma`lumotlarni;

b) quyidagi hujjatlarni:

– moliyaviy hisobotlar nusxalarini;

– jismoniy shaxslarning oxirgi 12 oydagi ish haqini tasdiqlovchi ma`lumotnomalarni;

– ijtimoiy nafaqa va pensiyalar to`langanligi to`g`risida ma`lumotnomalarni talab qilish bekor qilinadi.

Davlat organlari va tashkilotlari jismoniy shaxslarga davlat xizmatlarini ko`rsatishda, ishga qabul qilish jarayonida va boshqa ma`muriy tartib-taomillarni ushbu 16 turdagi hujjat va ma`lumotlarni mustaqil ravishda “Elektron hukumat” tizimi idoralararo integrasiyalashuv platformasi orqali so`rab oladi.