“Qoraqalpog`istondagi Qorotov stansiyasida passajir poezdida yong`in sodir bo`lgan” sarlavhasi ostida tarqalgan yong`in yuzasidan Favqulotda vaziyatlar vazirligi ma`lumot berdi.
Ma`lum qilinishicha, bugun, 4 avgust kuni soat 13:29 da Qoraqalpog`iston Respublikasi Favqulodda vaziyatlar boshqarmasiga Qorao`zak tumani “Qorao`zak” stansiyasida turgan vagonlarning birida yong`in sodir bo`layotganligi to`g`risida xabar kelib tushgan.
Shunga ko`ra, 3 ta yong`in-qutqaruv ekipaji soat 14:30 da voqea joyiga etib borgan. Yong`in soat 14:40 da o`rab olinib, 14:58 da to`liq bartaraf etilgan.
Ma`lumot o`rnida aytib o`tish joizki, yong`in o`chirish qismidan yong`in sodir bo`lgan manzilgacha masofa taxminan 45 km.ni tashkil etadi.
Ma`lum bo`lishicha, yong`in Qo`ng`irot yo`li mashina stansiyasiga qarashli ishchilar yotoqxona sifatida foydalanishga mo`ljallangan, boshqa tarkibdagi vagonlardan alohida turgan vagonda sodir bo`lgan.
Hodisa oqibatida halok bo`lgan va jabrlanganlar yo`q.
Hozirda yong`in sababi va moddiy zarar miqdori aniqlanmoqda.
Mazkur holat yuzasidan dastlabki tergovoldi surishtiruv ishlari olib borilmoqda.
