Kecha yurtimizda boshlangan Oliy o`quv yurtlariga kirish imtixonlarida matematika, biologiya, kimyo kabi fanlardan topshiriqlar aks etgan suratlar tarqalib ketgani haqida xabar bergan edik.
Kirish imtixonlarining ikkinchi kunida ham ba`zi fanlardan test sinovi materiallari yana tarqalib ketdi. Davlat test markazi holat bo`yicha izoh berdi:
1. Matematika fanidan test topshiriqlari aks etgan 1185323 raqamli test topshiriqlari kitobi diagnostik test sinovlariga taalluqli bo`lib, 17-may kuni Qarshi shahridagi akademik liseylardan birining o`quvchilari uchun buyurtma qilingan. Diagnostik test natijasiga ko`ra talabgor 90,5 ball (280,5 balldan) to`plagan. Mazkur test topshiriqlari kitobi 2021-2022-o`quv yili uchun oliy ta`lim muassasalarinig bakalavriat ta`lim yo`nalishlariga kirish test sinovlariga tegishli emas.
2. Kimyo fanidan test topshiriqlari aks etgan 1155745 raqamli test topshiriqlari kitobi 5-avgust kuni Toshkent shahrida o`tkazilgan test sinovlariga taalluqli bo`lib, mazkur abiturient test sinovi vaqtida telefondan foydalangani videokuzatuv orqali aniqlanib, Vazirlar Mahkamasining 2018-yil 3-apreldagi 261-son qarori bilan tasdiqlangan “O`zbekiston Respublikasi oliy ta`lim muassasalarining bakalavriatiga o`qishga qabul qilish uchun kirish test sinovlarini o`tkazish tartibi to`g`risidagi” Nizomning 52-bandiga muvofiq test sinovidan chetlashtirildi.
3. Majburiy fanlar blokining O`zbekiston tarixi va matematika fanlaridan test topshiriqlari aks etgan 1186266 raqamli test topshiriqlari kitobi 5-avgust kuni Qashqadaryo viloyatida o`tkazilgan test sinovlariga taalluqli bo`lib, mazkur abiturient test topshiriqlari kitobi varag`ini yirtib, tashqariga olib chiqqani uchun Vazirlar Mahkamasining 2018-yil 3-apreldagi 261-son qarori bilan tasdiqlangan “O`zbekiston Respublikasi oliy ta`lim muassasalarining bakalavriatiga o`qishga qabul qilish uchun kirish test sinovlarini o`tkazish tartibi to`g`risidagi” Nizomning 52-bandiga muvofiq test sinovidan chetlashtirildi.
4. Biologiya va kimyo fanlaridan test topshiriqlari aks etgan 1235875 raqamli test topshiriqlari kitobi 6-avgust kuni Qashqadaryo viloyatida o`tkazilgan test sinovlariga taalluqli bo`lib, mazkur abiturient test sinovi vaqtida telefondan foydalanayotgani aniqlanib, dalolatnoma asosida test sinovlaridan chetlashtirilgan.
