Кеча юртимизда бошланган Олий ўқув юртларига кириш имтихонларида математика, биология, кимё каби фанлардан топшириқлар акс этган суратлар тарқалиб кетгани ҳақида хабар берган эдик.
Кириш имтихонларининг иккинчи кунида ҳам баъзи фанлардан тест синови материаллари яна тарқалиб кетди. Давлат тест маркази ҳолат бўйича изоҳ берди:
1. Математика фанидан тест топшириқлари акс этган 1185323 рақамли тест топшириқлари китоби диагностик тест синовларига тааллуқли бўлиб, 17-май куни Қарши шаҳридаги академик лицейлардан бирининг ўқувчилари учун буюртма қилинган. Диагностик тест натижасига кўра талабгор 90,5 балл (280,5 баллдан) тўплаган. Мазкур тест топшириқлари китоби 2021-2022-ўқув йили учун олий таълим муассасалариниг бакалавриат таълим йўналишларига кириш тест синовларига тегишли эмас.
2. Кимё фанидан тест топшириқлари акс этган 1155745 рақамли тест топшириқлари китоби 5-август куни Тошкент шаҳрида ўтказилган тест синовларига тааллуқли бўлиб, мазкур абитуриент тест синови вақтида телефондан фойдалангани видеокузатув орқали аниқланиб, Вазирлар Маҳкамасининг 2018-йил 3-апрелдаги 261-сон қарори билан тасдиқланган “Ўзбекистон Республикаси олий таълим муассасаларининг бакалавриатига ўқишга қабул қилиш учун кириш тест синовларини ўтказиш тартиби тўғрисидаги” Низомнинг 52-бандига мувофиқ тест синовидан четлаштирилди.
3. Мажбурий фанлар блокининг Ўзбекистон тарихи ва математика фанларидан тест топшириқлари акс этган 1186266 рақамли тест топшириқлари китоби 5-август куни Қашқадарё вилоятида ўтказилган тест синовларига тааллуқли бўлиб, мазкур абитуриент тест топшириқлари китоби варағини йиртиб, ташқарига олиб чиққани учун Вазирлар Маҳкамасининг 2018-йил 3-апрелдаги 261-сон қарори билан тасдиқланган “Ўзбекистон Республикаси олий таълим муассасаларининг бакалавриатига ўқишга қабул қилиш учун кириш тест синовларини ўтказиш тартиби тўғрисидаги” Низомнинг 52-бандига мувофиқ тест синовидан четлаштирилди.
4. Биология ва кимё фанларидан тест топшириқлари акс этган 1235875 рақамли тест топшириқлари китоби 6-август куни Қашқадарё вилоятида ўтказилган тест синовларига тааллуқли бўлиб, мазкур абитуриент тест синови вақтида телефондан фойдаланаётгани аниқланиб, далолатнома асосида тест синовларидан четлаштирилган.
