AOKA direktori Asadjon Xodjaev O`zbekiston kikboksing assosiasiyasi prezidenti etib saylandi

Bugun AOKAda O`zbekiston kikboksing assosiasiyasining navbatdagi konferensiyasi o`tkazildi. Unda assosiasiya rahbarlari, Ijroi qo`mitasi a`zolari, sportchilar hamda OAV xodimlari ishtirok etgan.

Konferensiyada kikboksing sport turi shu yilning iyul oyida olimpiada o`yinlari kiritilgani — O`zbekiston kikboksing assosiasiyasi faoliyatini yanada kuchaytirish, O`zbekistonda ushbu sport turiga bo`lgan qiziqish va e`tiborning yana oshishiga turtki bo`lishi e`tirof etilgan.

Tadbirda tashkiliy masalalar ham ko`rilgan. Assosiasiya rahbar organlari tizimiga o`zgartirish kiritilib, rais lavozimi joriy etildi, tashkilotning yangi Ustavi qabul qilingan.

Shu paytga qadar assosiasiya prezidenti vazifasini bajarib kelgan Oybek Normetov assosiasiya raisligiga saylangan. Assosiasiya prezidentligiga esa Axborot va ommaviy kommunikasiyalar agentligi direktori Asadjon Xodjaev saylangan:

— Mamlakatimiz rahbarining sportga qaratayotgan e`tibori — Tokioda o`tkazilgan olimpiada o`yinlarida qo`lga kiritilgan natijalarda ham o`z aksini topdi. Ushbu g`alabalarga yaratilgan sharoit hamda murabbiylar va sportchilarning mashaqqatli mehnatlari evaziga erishildi. Eng birinchi navbatda, yoshlarni ushbu sport turiga kengroq qiziqtirish va jalb etishimiz lozim. Buning uchun sport inshootlarini qayta qurish, rekonstruksiya qilish, yoshlarning sport bilan shug`ullanishlari uchun sharoit yaratish juda muhim. Shuningdek, Kikboksing assosiasiyasining moddiy-texnik bazasini mustahkamlash, sportchilarimizning tayyorgarlik jarayonlari, o`quv-yig`inlari, musobaqalar uchun maxsus zallar va maydonlar tashkil etish, kikboksing bo`yicha murabbiylarni ko`paytirish, ularning malakasini oshirish bo`yicha ish olib boramiz. Ishonchim komilki, oldimizda turgan muhim vazifalarni amalga oshirsak, kikboksingchilarimiz ham boshqa sportchilari singari nufuzli musobaqalarda yurtimiz bayrog`ini baland ko`taradi.