АОКА директори Асаджон Ходжаев Ўзбекистон кикбоксинг ассоциацияси президенти этиб сайланди

Бугун АОКАда Ўзбекистон кикбоксинг ассоциациясининг навбатдаги конференцияси ўтказилди. Унда ассоциация раҳбарлари, Ижрои қўмитаси аъзолари, спортчилар ҳамда ОАВ ходимлари иштирок этган.

Конференцияда кикбоксинг спорт тури шу йилнинг июль ойида олимпиада ўйинлари киритилгани — Ўзбекистон кикбоксинг ассоциацияси фаолиятини янада кучайтириш, Ўзбекистонда ушбу спорт турига бўлган қизиқиш ва эътиборнинг яна ошишига туртки бўлиши эътироф этилган.

Тадбирда ташкилий масалалар ҳам кўрилган. Ассоциация раҳбар органлари тизимига ўзгартириш киритилиб, раис лавозими жорий этилди, ташкилотнинг янги Устави қабул қилинган.

Шу пайтга қадар ассоциация президенти вазифасини бажариб келган Ойбек Норметов ассоциация раислигига сайланган. Ассоциация президентлигига эса Ахборот ва оммавий коммуникациялар агентлиги директори Асаджон Ходжаев сайланган:

— Мамлакатимиз раҳбарининг спортга қаратаётган эътибори — Токиода ўтказилган олимпиада ўйинларида қўлга киритилган натижаларда ҳам ўз аксини топди. Ушбу ғалабаларга яратилган шароит ҳамда мураббийлар ва спортчиларнинг машаққатли меҳнатлари эвазига эришилди. Энг биринчи навбатда, ёшларни ушбу спорт турига кенгроқ қизиқтириш ва жалб этишимиз лозим. Бунинг учун спорт иншоотларини қайта қуриш, реконструкция қилиш, ёшларнинг спорт билан шуғулланишлари учун шароит яратиш жуда муҳим. Шунингдек, Кикбоксинг ассоциациясининг моддий-техник базасини мустаҳкамлаш, спортчиларимизнинг тайёргарлик жараёнлари, ўқув-йиғинлари, мусобақалар учун махсус заллар ва майдонлар ташкил этиш, кикбоксинг бўйича мураббийларни кўпайтириш, уларнинг малакасини ошириш бўйича иш олиб борамиз. Ишончим комилки, олдимизда турган муҳим вазифаларни амалга оширсак, кикбоксингчиларимиз ҳам бошқа спортчилари сингари нуфузли мусобақаларда юртимиз байроғини баланд кўтаради.