Avval xabar qilganimizdek, Toshkent davlat iqtisodiyot universiteti sobiq prorektori Nodir Fozilovich Idiev qidiruvga berildi. Manbalarda ma`lum qilinishicha, sobiq mansabdor 2 million AQSh dollari miqdorida davlat byudjeti pulini o`zlashtirganlikda ayblanmoqda.
Mazkur xabardan so`ng, ijtimoiy tarmoq va internet sahifalarida Toshkent davlat iqtisodiyot universitetining sobiq prorektori bilan bog`liq holat bo`yicha turli xabarlar tarqatilmoqda. Hattoki, ayrim elektron nashrlar avgust oyida universitet tomonidan qidiruv e`lon qilinganligini ham yozishga ulgurdi. Holat yuzasidan Toshkent davlat iqtisodiyot universiteti munosabat bildirdi.
Ma`lum qilinishicha, Nodir Fozilovich Idiev “Asaka bank” AJ Buxoro viloyati filialida faoliyat yuritgan davridagi ishlari sabab qidiruvga berilgan. N. Idievga qo`yilayotgan ayblov uning Toshkent davlat iqtisodiyot universitetidagi faoliyati bilan bog`liq emas.
"Ommaviy axborot vositalari va ijtimoiy tarmoq faollarini esa ushbu vaziyat yuzasidan (ortiqcha bo`rttirishlarsiz) xolis axborot tarqatishga chorlab qolamiz.
Toshkent davlat iqtisodiyot universiteti ommaviy axborot vositalari va boshqa ijtimoiy tarmoq faollari uchun hamisha ochiqlik tamoyili asosida hamkorlik qilishga tayyor", - deyiladi rasmiy munosabatda.
