Avstraliya bosh vaziri Skott Morrison nima uchun Fransiya bilan suvosti kemalari shartnomasi bekor qilinganini ma`lum qildi. Bu haqda “TASS”ga tayanib Zamon.uz xabar berdi.
Uning so`zlariga ko`ra, shartnoma “jiddiy muammolar”ni yuzaga keltirgan. Uning bekor qilinishiga asosiy sabablardan biri loyihaning amalga oshirilishidagi ko`plab to`xtalishlar va o`sib borgan xarajatlar bo`lgan.
“Ushbu shartnoma asosida ishlab chiqarilgan suvosti kemasi faqat 2038 yilga borib dengizga tushgan bo`lardi. Ya`ni u suvga tushishi bilan eskirgan bo`lar edi”, – degan Morrison.
Bosh vazirning qo`shimcha qilishicha, Avstraliya har doim atom suvosti kemalariga ega bo`lishni xohlagan. U, shuningdek, boshqa davlatlardan shu turdagi texnikani sotib olishni sentyabrda emas, balki 18 oy oldin o`ylaganini ta`kidlaydi.
Ma`lumot uchun, 2021 yil sentyabrda Avstraliya Fransiya bilan 66 milliard dollarlik suvosti kemalarini etkazib berish bo`yicha shartnomani bekor qildi. Bunga AQShning Kanberraga atom suvosti kemalarini etkazib berishga kelishib olgani sabab bo`ldi.
