Bu haqda Davlat bojxona qo`mitasi matbuot xizmati ma`lum qildi.
Xorijdan poytaxtimizda istiqomat qiluvchi fuqaro nomiga yuborilgan 3 dona pochta jo`natmasida aslida hujjatlarga muvofiq jami 74 dona oddiy bijuteriya va qo`l soatlari bo`lishi lozim edi.
Ammo, jo`natmalar belgilangan tartibda bojxona ko`rigidan o`tkazilganida, undagi taqinchoqlar qimmatbaho toshlar va qimmatbaho metallardan ishlangan zargarlik buyumlari ekanligi aniqlandi.
3 ta pochta jo`natmasida jahonga mashhur nufuzli brendning tilladan ishlangan 664,7 gr. og`irlikdagi 58 dona zargarlik buyumlari, shuningdek 26 dona qo`l soatlari borligi ma`lum bo`ldi. Mazkur taqinchoq va soatlarning aksariyati esa qimmatbaho olmos toshlari bilan bezalgan.
Dastlabki hisob-kitoblarga ko`ra, ushbu zargarlik buyumlarining umumiy qiymati 1 milliard 593 million so`mdan oshmoqda.
Hozirda mazkur holat yuzasidan bojxona organlari tomonidan tekshiruv va surishtiruv harakatlari davom ettirilmoqda.
