Farg`ona viloyati hokimi Xayrullo Bozorov viloyat sektorlari rahbarlari bilan Marg`ilon shahrida B.Marg`iloniy va Al-Farg`oniy ko`chalari kesishmasida joylashgan “Yoshlar xiyoboni” majmuasini ko`zdan kechirdi.
Xiyobonda aholining sayr qilishi, dam olishi uchun sharoitlar mavjud emasligi, archa daraxtlari yozda soya-salqin bermasligi, xiyobon hududida o`tirib dam olish uchun o`rindiqlar yo`qligi, yoritish tizimi etarsiz ekaniga tanqidiy e`tibor qaratildi, deya xabar bermoqda hokimlik.
Qayd etilishicha, viloyat hokimi huvillagan Yoshlar xiyobonini marg`ilonliklar uchun jozibador maskanga aylantirish konsepsiyasini ishlab chiqish bo`yicha topshiriq berdi. Bunda asosiy e`tiborni salqin beradigan daraxtlar ekish, o`rindiqlar o`rnatish, xiyobon bo`ylab bepul Wi-Fi bilan qamrovni ta`minlash, shuningdek zamonaviy Bookcafe barpo etishga qaratish lozimgigi belgilangan.
Yangicha ko`rinishda Ziyo xiyoboniga aylanadigan ushbu maskanda aholi o`rtasida sog`lom turmush tarzini ommalashtirish, marg`ilonliklarni bo`sh vaqtlarda, kechki paytda xiyobon bo`ylab sayr qilishlari uchun qulayliklar yaratish rejalashtirib olingan.
