Unda 2200 nafar sportchi va havaskorlar ishtirok etmoqda. Bu haqda zamon.uz xabar bermoqda.
Bugun, 27 mart kuni poytaxtda mukofot jamg`armasi 138 million so`mdan iborat bo`lgan Shanxay hamkorlik tashkiloti xalqaro yarim marafoni start oldi.
O`zbekistonning Shanxay hamkorlik tashkilotiga raisligidagi ilk tadbir bo`lgan mazkur marafonda 2200 nafar sportchi va havaskorlar qatnashmoqda. Musobaqa dasturiga binoan, ishtirokchilar 3 va 21 kilometr masofada kuch sinashadi.
Nufuzli musobaqa bahslarini respublikamizning eng tajribali 80 nafar hakami boshqarib boradi. Marafon tartibli, xalqaro talablar darajasida o`tkazilishini ta`minlash uchun hakamlarga poygalar davomida 230 nafar ko`ngilli volontyor texnik-taktik tomondan ko`mak beradi.
Marafonda erkaklar va ayollar o`rtasida 1-5 o`rinlarni egallagan ishtirokchilar pul mukofotlari bilan hamda g`olib, sovrindorlar medallar bilan taqdirlanadi.
Yana bir e`tiborli jihati, yarim marafonning translyasiyasi mamlakatimiz va xorijiy telekanallar orqali tug`ridan-to`g`ri namoyish etiladi.
Ishtirokchilarning natijalarini Xalqaro engil atletika federasiyasi hamda AIMSning texnik ekspertlari Ilya Mixaylovskiy va Adrianus Stevens baholab boradi.
