Turli nayranglarni qo`llagan holda yurtimizdan naqd xorijiy valyutalarni noqonuniy tarzda olib chiqishga bo`lgan urinishlarga qarshi bojxona organlari tomonidan tizimli tarzda kurash olib borilmoqda.
Xususan, Bojxona qo`mitasi Matbuot xizmatining darakchi.uz'ga xabar berishicha, Andijon viloyati bojxona boshqarmasi “Do`stlik” chegara bojxona postiga chiqish piyoda yo`lagi orqali Qirg`iziston Respublikasiga o`tib ketish maqsadida kirib kelgan fuqaro Z.Ya. bojxonachilar og`zaki so`rovida valyuta boyliklari yo`qligini ma`lum qilgan. Ammo shundan so`ng ushbu shaxsga tegishli bo`lgan siyoxrang polietilen paket xolislar ishtirokida ko`zdan kechirilganida nonlar orasiga qora rangli polietilen paketga o`rab qo`yilgan 73 815 AQSh dollari borligi ma`lum bo`ldi.
Shuningdek, fuqaro Z.Ya. xolislar ishtirokida bojxona shaxsiy ko`rigidan o`tkazilganida uning yonidan kiyimlari orasiga yashirilgan yana 40 000 AQSh dollari mavjud ekanligi aniqlandi.
Natijada, deklarasiyada ko`rsatilmagan va bojxonachilar og`zaki so`rovida ma`lum qilinmagan jami 113 815 AQSh dollarini Respublikamiz hududidan noqonuniy tarzda olib chiqilishi oldi olindi.
Hozirda mazkur holat yuzasidan Andijon viloyati bojxona boshqarmasi tomonidan tergovga qadar tekshiruv harakatlari davom ettirilmoqda.
