Farg`onada otasini pichoqlab o`ldirgan farzandga sud hukmi o`qildi. Bu haqda "Darakchi" muxbiri Ahror Ziyaev xabar bermoqda.
Ma`lum qilinishicha, voyaga etmagan A.ning ota-onasi birga yashamaydilar, ular 2015 yilda ajrashgan. A. esa ukasi va onasi bilan birga yashab keladi. Bolaligidan otasi bilan kelishmovchiliklar yuzaga kelgan, shu sababli undan nafratlanishini aytadi. Otasi boshqa ayolga uylanib, Farg`ona shahridagi ko`p qavatli uylarning birida yashab kelgan. Ikkinchi oilasidan 2 nafar qizi bor.
Voyaga etmagan A. 2022 yil 27 fevral kuni soat 16.00 larda Farg`ona shahridagi otasi istiqomat qilayotgan uyga kelib, otasi bilan o`rtalarida bo`lgan oilaviy munosabat yuzasidan o`zaro janjallashib ketadi. O`zi bilan birga olib kelgan oshxona pichog`i bilan uning qorin qismiga bir marotaba urib, og`ir tan jarohati etkazadi va voqea joyini tark etadi.
Oqibatda, otasi tan jarohati olib, o`sha erdagi fuqarolar tomonidan shifoxonaga olib borilgan, biroq shifokorlar tomonidan ko`rsatilgan tibbiy muolajalarga qaramasdan shu kuni shifoxonada vafot etgan.
Voyaga etmagan A. O`zbekiston Respublikasi JKning 104-moddasi 3-qismi “d” bandida ko`rsatib o`tilgan jinoyatni sodir etgan. Jinoyat ishlari bo`yicha Farg`ona shahri sudida A.ning ishi ko`rib chiqildi.
Sud jarayoniga oila yashagan MFY raisi va xotin-qizlar faoli, xolatni ko`zi bilan ko`rgan guvohlar va marhumning ayoli taklif etildi. Sudda raislik etuvchi har birlarining so`zlarini birma-bir tingladi. A. esa panjara ortida afsusda ekanligi, onasiga o`tkazilgan tazyiqlar sabab otasini qo`rqitib qo`ymoqchi bo`lganligi, hammasi tasodifan ro`y berganini so`zladi. Guvohlar va tomonlarning so`zlarini tinglagan sudda raisli etuvchi hukmni e`lon qildi. Voyaga etmagan A. 5 yilga ozodlikdan mahrum etildi.
