Фарғонада отасини пичоқлаб ўлдирган фарзандга суд ҳукми ўқилди. Бу ҳақда "Даракчи" мухбири Аҳрор Зияев хабар бермоқда.
Маълум қилинишича, вояга етмаган А.нинг ота-онаси бирга яшамайдилар, улар 2015 йилда ажрашган. А. эса укаси ва онаси билан бирга яшаб келади. Болалигидан отаси билан келишмовчиликлар юзага келган, шу сабабли ундан нафратланишини айтади. Отаси бошқа аёлга уйланиб, Фарғона шаҳридаги кўп қаватли уйларнинг бирида яшаб келган. Иккинчи оиласидан 2 нафар қизи бор.
Вояга етмаган А. 2022 йил 27 февраль куни соат 16.00 ларда Фарғона шаҳридаги отаси истиқомат қилаётган уйга келиб, отаси билан ўрталарида бўлган оилавий муносабат юзасидан ўзаро жанжаллашиб кетади. Ўзи билан бирга олиб келган ошхона пичоғи билан унинг қорин қисмига бир маротаба уриб, оғир тан жароҳати етказади ва воқеа жойини тарк этади.
Оқибатда, отаси тан жароҳати олиб, ўша ердаги фуқаролар томонидан шифохонага олиб борилган, бироқ шифокорлар томонидан кўрсатилган тиббий муолажаларга қарамасдан шу куни шифохонада вафот этган.
Вояга етмаган А. Ўзбекистон Республикаси ЖКнинг 104-моддаси 3-қисми “д” бандида кўрсатиб ўтилган жиноятни содир этган. Жиноят ишлари бўйича Фарғона шаҳри судида А.нинг иши кўриб чиқилди.
Суд жараёнига оила яшаган МФЙ раиси ва хотин-қизлар фаоли, холатни кўзи билан кўрган гувоҳлар ва марҳумнинг аёли таклиф этилди. Судда раислик этувчи ҳар бирларининг сўзларини бирма-бир тинглади. А. эса панжара ортида афсусда эканлиги, онасига ўтказилган тазйиқлар сабаб отасини қўрқитиб қўймоқчи бўлганлиги, ҳаммаси тасодифан рўй берганини сўзлади. Гувоҳлар ва томонларнинг сўзларини тинглаган судда раисли этувчи ҳукмни эълон қилди. Вояга етмаган А. 5 йилга озодликдан маҳрум этилди.
