Turizm va madaniy meros vazirligi hamda Qashqadaryo viloyati hokimligi tomonidan joriy yilning 8–12-avgust kunlari “Yoshlar turizmi” qurultoyi o`tkaziladi. Bu haqda vazirlik Matbuot xizmati xabar berdi.
Ushbu tadbir O`zbekiston Respublikasi Prezidentining 2022 yil 30 aprelda qabul qilingan Ichki turizm xizmatlarini diversifikasiya qilishga oid qo`shimcha chora-tadbirlar to`g`risida" qarori ijrosini ta`minlash maqsadida tashkil qilinmoqda.
Qurultoyda 800 nafar ishtirokchi qatnashishi kutilmoqda. Xususan, MDH davlatlaridan (Tojikiston, Qozog`iston, Qirg`iziston, Turkmaniston) yoshlar Shahrisabz tumaniga tashrif buyuradi.
Shuningdek, Abbos Sulaymonov, Husnora Shodieva, Ruxsora Masharipova, Elyor Meliboev, Hojiakbar Ro`zmetov kabi yoshlar orasida mashhur bo`lgan bloger va xonandalar ham ishtirok etadi.
“Lochin” oromgohida boshlanadigan tadbirdan kitobxonlik, mahorat darslari, milliy va etnosport turlari bo`yicha sport musobaqalari, madaniy ko`ngilochar tadbirlar, gala-konsert va boshqa tadbirlar o`rin olgan. Shuningdek, yoshlar taniqli teatr va kino ijodkorlari bilan ijodiy muloqot qilish imkoniga ega bo`lishadi.
Bundan tashqari, qurultoy doirasida ishtirokchilar uchun turizm obektlariga sayohatlar uyushtirilishi rejalashtirilgan. Mahalliy va xorijiy ommaviy axborot vositalari uchun infotur ham tashkil qilinadi.
