Avval xabar berganimizdek, 13-18 sentyabr kunlari “Ipak yo`li durdonasi” XIV Toshkent xalqaro kinofestivali o`tkazilmoqda. 15 sentyabr kuni kinofestivalning tantanali ochilish marosimi bo`lib o`tdi. Unda 14 davlatdan tashrif buyurgan kino ustalari va mashhur yulduzlarning qizil yo`lak bo`ylab kirib kelishi tadbirning asosiy qismi bo`ldi.
Darhaqiqat, muxlislar tomonidan olqishlar ostida kirib kelgan jahon yulduzlari orasida turk kinoaktyorlariga bo`lgan qiziqish alohida sezilib turdi. O`zbek kinosevarlari turk kinolari orqali tanish bo`lgan chehralarni olqish va hayqiriqlar bilan qarshi oldi.
"darakchi.uz" mazkur tantanali ochilish marosimda turk san`tiga bo`lgan qiziqishlarni inobatga olib, qardosh mamlakat delegasiyasi a`zolari bilan suhbatda bo`ldi. Turkiya Madaniyat va Turizm vaziri o`rinbosari Ahmet Misbah Demircan O`zbekiston haqida, shuningdek, ikki mamlakat madaniyatidagi o`ziga xoslik va birlik xususida o`z qarashlari bilan o`rtoqlashdi.
"O`zbekiston deganda tarixiy binolar, maqbaralar, madrasalar ko`z oldimizga keladi. Hoja Ahmad Yassaviydan boshlab, garchi uning maqbarasi O`zbekistondan tashqarida bo`lsa ham, lekin bitta mintaqada, barcha ulug`larni ixlos bilan yaxshi ko`ramiz. Samarqand, Buxoro, Toshkentdagi qadimiy binolarni juda yoqtiraman. Eng muhimi, o`zbeklarning mehmondo`stligi, samimiyligi yoqdi. Odamgarchiligi yoqdi. Milliy taom — palovni ham juda yoqtiraman.
O`zbekiston bizning ota yurtimiz. Turklar shu hududdan ilhom oladi. Bu erga kelmay turib, madaniy ildizlarimizni tushuna olmaymiz. Shu bois aloqalarimizda kamchiliklar bo`lmasligi kerak. O`zbekiston turk dunyosida ham o`zining mustahkam o`rnini topib boryapti. O`zbekiston madaniyati juda qadimiy, u erdan kino uchun istalgan mavzularni topsa bo`ladi. Bu erda juda ko`p hamkorlikda ishlar qilish mumkin", - dedi Ahmet Misbah Demircan
Ma`lumot uchun: 15 sentyabr kuni Toshkentdagi "O`zbekiston" forumlar saroyida "Turk kinosi kunlari"ning tantanali kechasi bo`lib o`tdi.
