XIV Toshkent Xalqaro kinofestivali doirasida tashkil etilgan "Turk kinosi kunlari" tadbiri kutilganidek minglab muxlislarni bir manzilda jamladi, sababi unda turkiyalik mashhur rejissyor va aktyorlar ham ishtirok etishdi.
Tadbirda mehmon va mezbon ijodkorlar an`anaga ko`ra qizil yo`lakdan o`tishdi. Alvon gilamda yosh ijodkorlardan tortib, taniqli, el sevgan o`zbek va turk aktyorlarni uchratish mumkin.
Mashhurlar bilan ko`rishish istagida jamlangan muxlislar esa deyarli har bir ijodkor bilan suratga tushdi.
Kechaning asosiy mehmonlaridan biri Nurgul Eshilchay va Burka O`zchivit bo`ldi.
Turkiyalik yulduzlar ikkinchi marotaba muxlsilari qurshovida qolib ketdi.
Turkiyalik ijodkorlar o`rtasidagi tushunmovchilik... Aslida vaziyat qanday bo`lgan?
Bugun ijtimoiy tarmoqlarda “Turk kinosi kunlari”da turk aktyorlari o`rtasida yuzaga kelgan o`zaro kelishmovchilik sababli go`yoki ushbu tadbir "buzilgani" haqida xabarlar tarqalmoqda.
Ammo bu xabar haqiqatga to`g`ri kelmaydi.
Uchrashuvlar dastur asosida o`tkazildi. Ijodiy uchrashuv davomida so`zga chiqishi kerak bo`lgan aktyorlarning barchasi so`zga chiqdi.
Xususan, Kinematografiya agentligi bosh direktori Firdavs Abduxoliqov: "Agar aktyorlar shaxsiy sabablarga ko`ra, bitta sahnada yoki zalda o`tirishni istashmagan ekan, bu ularning shaxsiy ishi. Qolaversa, biz mehmon san`atkorlarga bosim o`tkaza olmaymiz. Eng muhimi, va`da qilingan barcha aktyorlar tadbirga taklif etildi va uchrashuvlar to`xtab qolgani yo`q" deya ta`kidladi.
Tadbirning eng "qaynoq" lahzalarini You Tube sahifamizda tomosha qilishingiz mumkin.
Oybek Shukurov.
