Ayni paytda "Kinochilar uyi"da “Ipak yo`li durdonasi” XIV Toshkent xalqaro kinofestivali doirasida “Bugungi kundagi dunyo mamlakatlarining kinematografiya sohasidagi qonunchiligini muhokama qilish. Kino ishlab chiqarish va kinoprokatni davlat tomonidan qo`llab-quvvatlash” mavzusida davra suhbati bo`lib o`tdi. Bu haqda Kinematografiya agentligi Axborot xizmati ma`lum qildi.
Unda Kinematografiya agentligi Bosh direktori Firdavs Abduxoliqov tabrik so`zi bilan chiqdi. U Respublikamiz Prezidenti Shavkat Mirziyoevning kinematografiya sohasini qo`llab-quvvatlayotgani va O`zbekistonda kino sanoatini rivojlantirishga yo`naltirilayotgan davlat sarmoyalari haqida so`zladi:
“Hozirgi kunda filmlar suratga olish ishlarini qo`llab-quvvatlash uchun ajratilayotgan mablag`lar miqdori qariyb 10 barobarga oshdi, dastlabki 30 yilda 21 ta film suratga olingan bo`lsa, keyingi 4 yilda bu ko`rsatkich 30 dan ortdi.
Shuningdek, biz BDKIning xorijdagi birinchi yangi filialini va hozirda ko`plab talabalarga ega bo`lgan dunyoga mashhur «Gerasim» studiyasini yaratdik. Bundan tashqari, poytaxtimizda 60 tagacha kinoteatr faoliyat ko`rsatmoqda.
O`tgan haftada Samarqand, Buxoro kabi shaharlarda, shuningdek, Xorazm viloyatida kinoteatrlarda prokat tashkil etish bo`yicha korxonalar tashkil etildi. Uskunalar ham sotib olindi va kinoklasterlar yaratildi.
Kinoteatrlar ko`p odamlarga xizmat qiladi. So`nggi paytlarda kinoloyihalar yaratishga katta e`tibor qaratyapmiz. Ayni paytda biz Rossiya, Qozog`iston, Belarus va turli davlatlarning boshqa kinostudiyalari bilan hamkorlikda kinoloyihalar ustida ishlayapmiz”, — deya ta`kidladi Firdavs Abduxoliqov.
Tadbir ishtirokchilari kino ishlab chiqarish va prokatni davlat tomonidan qo`llab-quvvatlash borasidagi xalqaro tajribalari bilan ham o`rtoqlashmoqda. Ozarbayjon, Armaniston, Belarus, Isroil, Hindiston, Eron, Qozog`iston, Qirg`iziston, Quvayt, Meksika, Mo`g`uliston, Rossiya, Tojikiston, Estoniya, Janubiy Koreya kabi davlatlar vakillari so`zga chiqishgan.
