Avval xabar qilganimizdek, ayni paytda Navoiy shahrida Xalq deputatlari Navoiy viloyati Kengashi sessiyasi bo`lib o`tmoqda.
Sessiyada Navoiy viloyatiga hokim tayinlash bo`yicha tashkiliy masala ko`rib chiqilmoqda, deya xabar qildi Prezident matbuot xizmati.
Prezident viloyat faollarining bildirgan fikrlari asosida Navoiy viloyati hokimi lavozimiga hokim vazifasini bajarib kelayotgan Normat Tursunov To`lqunovich nomzodini tavsiya etdi.
Nomzodning hududni jadal rivojlantirish, aholiga munosib turmush sharoiti yaratish, mavjud muammolarni hal etish bo`yicha rejalarini eshitish taklif qilindi.
Nomzod viloyatda tadbirkorlik va xizmatlar sohasini rivojlantirish bo`yicha rejalarini aytdi.
Tadbirkorlikni rivojlantirish orqali kelgusi yilda 122 mingta ish o`rni yaratish imkoni bor.
Shulardan kelib chiqib, Prezident mutasaddilarga:
- kelgusi yilda 26 ta mahalliy sanoat markazi va kichik sanoat zonalarini tashkil etish;
- oilaviy tadbirkorlik dasturlari uchun qo`shimcha 100 milliard so`m, kelgusi yilda 600 milliard so`m yo`naltirish;
- Nurota, Xatirchi va Navbahordagi bo`sh binolarda mono-markaz tashkil etib, kamida 5 ming yoshlarni zamonaviy kasblarga o`qitish;
- M-37 magistral yo`lida 3,5 mingta servis ob`ektlarini ishga tushirish;
- Karmanadagi Mavlono Orif Deg-Garoniy majmuasini ta`mirlashga 15 milliard so`m ajratish;
- 20 ta turizm mahallasida infratuzilmani yaxshilash bo`yicha 50 milliard so`mlik loyihani 2023 yil davlat dasturiga kiritishga topshiriq berdi.
