Bu haqda ayni kunlarda Toshkent shahrida bo`lib o`tayotgan “Ipak yo`lida turizm” 27-Toshkent xalqaro turizm yarmarkasida Bosh vazir o`rinbosari – Turizm va madaniy meros vaziri Aziz Abduhakimov ma`lum qildi.
"Faxr bilan ta`kidlashimiz mumkinki, O`zbekiston bugun butun dunyo diqqat markazida. Yaqindagina Samarqandda Shanxay Hamkorlik Tashkilotining sammiti va Turkiy Davlatlar Tashkilotining IX sammiti kabi yirik xalqaro darajadagi tadbirlar bo`lib o`tdi.
2023 yilning kuz faslida esa UNWTO tarixida birinchi marta BMT Butunjahon Turizm Tashkiloti Bosh assambleyasining 25-sessiyasi bo`lib o`tishi kutilmoqda. O`tgan yili Ispaniyada bo`lib o`tgan 24-sessiya doirasida UNWTOga a`zo davlatlar turizm idoralari rahbarlari orasida o`tkazilgan ovozga qo`yish jarayonida O`zbekiston Portugaliyani ortda qoldirib, ushbu tadbirning yubiley marosimini Samarqand shahrida o`tkazishga qaror qilindi.
UNWTO Bosh assambleyasi yubiley sessiyasining qadimiy va navqiron Samarqandda o`tkazilishi mingdan ziyod xorijiy mehmonlarni jalb qilini tabiiy, bu esa mahalliy xalq va hunarmandlarning daromadini oshirish barobarida milliy iqtisodiyotimiz rivojiga ijobiy ta`sir ko`rsatadi.
Bundan tashqari, yuksak darajadagi ushbu tadbirning o`tkazilishi butun jahon ommaviy axborot vositalari e`tiborini O`zbekistonga qaratadi. Bu esa mamlakatimiz turizm salohiyatini yanada keng targ`ib qilish hamda O`zbekistonga keluvchi sayyohlar oqimini oshirish imkonini berishi shubhasiz.
Diqqatga sazovor yutuqlarimizdan yana biri shuki, Qo`qon - 2022 yil turkiy dunyo turizm poytaxti, Samarqand – 2023 yilgi jahon turizm poytaxti va Xiva – 2024 yil islom olami turizm poytaxti deya e`lon qilingan va bu O`zbekistonda yashovchi har bir fuqaroga g`urur bag`ishlaydi.
Bularning barchasi O`zbekistonning jahon hamjamiyati tomonidan tobora ko`proq tan olinayotgani va Buyuk Ipak Yo`lida o`z mavqeini mustahkamlab borayotganidan dalolat beradi", - dedi Abduhakimov.
Ma`lumot uchun: “O`zekspomarkaz” pavilonlarida “Ipak yo`lida turizm” 27-Toshkent xalqaro turizm yarmarkasi 2 dekabrga qadar davom etadi.