O`zbekistonda joriy yilning 8 oyda 414 nafar kishi ovqatdan zaharlandi. Bu haqda 21 sentyabr kuni Sanitariya-epidemiologik osoyishtalik va jamoat salomatligi xizmati boshlig`i o`rinbosari Nurmat Otabekov ma`lum qildi.
"Aholi orasida ovqatdani zaharlanish, guruhli kasallanish holatlari, ayniqsa, bu maishiy sharoitda emas, balki umumiy ovqatlanish muassasalarida, maktabgacha ta`lim tashkilotlarida qayd etilayotgani haqida xabaringiz bor. Agar statistik ma`lumotlarga e`tibor beradigan bo`lsak, joriy yilning 8 oyi mobaynida 39 ta holatda ovqatdan guruhli kasallanish qayd etilgan. Buning oqibatida 414 nafar fuqaro jabrlangan, ulardan 2 nafari vafot etgan. Zaharlanganlarning 86 nafarini bolalar tashkil qiladi. Shu jumladan, kasallanganlarning 81 nafarida botulizm qayd etilgan. Maishiy, ya`ni uy sharoitida guruhli kasallanish salatlarni tayyorlashda sanitariya qoidalariga, saqlash tartibiga rioya qilmaslik oqibatida yuzaga kelmoqda. Maktabgacha ta`lim tashkilotlarda bu kabi holatlar bizni ko`proq o`ylantirmoqda. 13 iyulda Sergeli tumanidagi 600-sonli bog`chada 12 nafar, Angren shahridagi 10-sonli bog`chada 27 nafar tarbiyalanuvchilarning guruhli ovqatdan zaharlanish holati ro`yxatga olingan. Maktabgacha ta`lim tashkilotlarida bunday holatlarning kuzatilishi, birinchidan, oshxonalar loyiha asosida qurilmayotgani, sanitariya talablariga zid ravishda faoliyat yuritayotgani va issiq-sovuq cuv ta`minotidagi muammolar bilan bog`liq. Mazkur oshxonalarda ishlatilayotgan jihozlar eskirgani, bolalarga ovqat tayyorlab berayotganlar nomutaxassis va sanitariya normalari bo`yicha o`qitilmagani ham asosiy sabablardan biri bo`lmoqda.", - degan Nurmat Otabekov.
