Ўзбекистонда жорий йилнинг 8 ойда 414 нафар киши овқатдан заҳарланди. Бу ҳақда 21 сентябрь куни Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков маълум қилди.
"Аҳоли орасида овқатдан заҳарланиш, гуруҳли касалланиш ҳолатлари, айниқса, бу маиший шароитда эмас, балки умумий овқатланиш муассасаларида, мактабгача таълим ташкилотларида қайд этилаётгани ҳақида хабарингиз бор. Агар статистик маълумотларга эътибор берадиган бўлсак, жорий йилнинг 8 ойи мобайнида 39 та ҳолатда овқатдан гуруҳли касалланиш қайд этилган. Бунинг оқибатида 414 нафар фуқаро жабрланган, улардан 2 нафари вафот этган. Заҳарланганларнинг 86 нафарини болалар ташкил қилади. Шу жумладан, касалланганларнинг 81 нафарида ботулизм қайд этилган. Маиший, яъни уй шароитида гуруҳли касалланиш салатларни тайёрлашда санитария қоидаларига, сақлаш тартибига риоя қилмаслик оқибатида юзага келмоқда. Мактабгача таълим ташкилотларда бу каби ҳолатлар бизни кўпроқ ўйлантирмоқда. 13 июлда Сергели туманидаги 600-сонли боғчада 12 нафар, Ангрен шаҳридаги 10-сонли боғчада 27 нафар тарбияланувчиларнинг гуруҳли овқатдан заҳарланиш ҳолати рўйхатга олинган. Мактабгача таълим ташкилотларида бундай ҳолатларнинг кузатилиши, биринчидан, ошхоналар лойиҳа асосида қурилмаётгани, санитария талабларига зид равишда фаолият юритаётгани ва иссиқ-совуқ cув таъминотидаги муаммолар билан боғлиқ. Мазкур ошхоналарда ишлатилаётган жиҳозлар эскиргани, болаларга овқат тайёрлаб бераётганлар номутахассис ва санитария нормалари бўйича ўқитилмагани ҳам асосий сабаблардан бири бўлмоқда.", - деган Нурмат Отабеков.
