Navoiyku bizga ustozdir biroq,
Kimdir o`qitganku Navoiyni ham…
Shoir shu ikki misra orqali ustozga eng buyuk ta`rifni bergan. Darhaqiqat, inson hayot yo`li davomida bosib o`tajak yo`lidagi pastu balandlarda, o`nqir-cho`nqirlarda ustoz bergan ta`lim-tarbiya muhim rol o`ynaydi. Oradan yillar o`tsa ham uning sabog`i, bergan dakkilari yodida qoladi.
Xo`sh, siz va bizga yaxshi tanish bo`lgan siyosat, adabiyot va san`at sohasi vakillari ustozlarini qanday eslaydi, mashhur insonlar ham maktabda dakki eshitib, o`qituvchisidan kaltak eganmi? Darakchi.uz shu savol bilan yuzlandi.
Ibrohim Abdurahmonov, Oliy ta`lim, fan va innovasion rivojlanish vaziri, akademik:
1982 yili Namangan viloyatining Chust tumani G`ovasoy qishlog`idagi 7-o`rta maktab (hozirgi 59-maktab)da 1-sinfga chiqqanman. Maktabimiza uyimizdan 2-3 kilometr uzoqda bo`lgani bois, uydan g`ira-shira payti chiqib ketishim, yana uzoq yurib qaytishlarim yodimda...
Birinchi o`qituvchim Mavluda opa Boltaeva qo`lida o`qib, savod chiqarganman. Mavluda opa mehribon, o`qituvchi edi, lekin kezi kelganda qattiqqo`llik ham qilardilar.
Doimo yaxshi, a`lo baholarga o`qiganman. Bir safar rasm darsida raketaning suratini yaxshi chizolmaganim sabab past baho olganman. Hamisha ”besh”ga o`qiganim bois bu menga qattiq ta`sir qilgan, rosa jahlim chiqqandi. Shunda rasmlarni qunt bilan chizishga ahd qilganman va uddalaganman ham. Shu-shu chiroyli rasm chizaman. Bu ko`nikmam keyinchalik biologiya fakultetiga kirganimda juda qo`l kelgan.
Rasul Kusherbaev, Ekologiya, atrof-muhitni muhofaza qilish va iqlim o`zgarishi vaziri maslahatchisi
Otam maktabda o`qituvchi edilar. Bizga rus tili va adabiyoti fanidan dars berganlar. Shuning uchun ham sinfda eng ko`p men dakki eshitardim. Otam o`zimizniki o`rnak bo`lmasa boshqalardan nimani talab qilaman derdilar. Bir kun vaqt qadri haqida bir mavzu bo`lib qoldi. Men 3 km uzoqlikda qatnab o`qirdim. shuning uchun uyga ham kech kelardim. Otam meni vaqt qadriga etmaydiganlardan biri sifatida misol qilib keltirardi. aynan shu narsa kelajakda vaqt qadriga etishimga sabab bo`lgan.
Kaltak ham eganmiz ba`zida. Lekin hozir buni aytish mavridi emas deb o`ylayman. O`sha paytda o`qituvchilarimiz qulog`imizni cho`zib qo`ygan bo`lsa, biz bunga loyiq nimadir ish qilganmiz. Hozir o`ylab turib, to`g`ri qilishgan ekan deb o`ylayman. Biz ham, ota-onalarimiz ham buni to`g`ri qabul qilganmiz. hozir kim alamini sochmoqchi bo`lsa maktabga kelishni o`rgangan. Bunday yondashuvni hech qachon oqlamayman.
Sherzodxon Qudratxo`ja, O`zJOKU rektori
Mariya Barisovna degan tatar millatiga mansub birinchi o`qituvchimiz bo`lardi. Men evropacha guruhda o`qiganman. Bizga juda qattiq turardi. Polni yaxshi yuvmasak, doskani tozalab artmasak, supurgi bilan urardi. ikki-uch marta meni ham urgan. Bir marta juda oddiy matematik masalani echolmaganim uchun "mel" bilan boshimga urgan. Bir sinfdosh do`stimizni boshini doskaga urgan. To`g`ri bunday qilish kerakmas, lekin bizni urgani bugun kor qildi.
Keyinchalik bir matematika o`qituvchimizni darsida o`rtog`im bilan orqaga qarab gaplashganman. Shunda meni urgan, burnim qonagan. Shu o`qituvchimni haligacha kechirolmayman. O`shanda meni burchakka qo`yishi mumkin edi, ota-onamni chaqirishi mumkin edi...
Rais Alekseevna degan kuratorim bo`lgan. Shu xotin bizga faqat yaxshi gapirardi. Ba`zida bolalar yig`latib yuborardi. O`shanda o`zimizni marazligimizdan afsuslanardim. Uyam bizga kuchli ta`sir qilardi. Urmay o`qitgan o`qituvchilar xotiramizda kuchli qolgan.
Usmon Azim, O`zbekiston xalq shoiri
Bichkov degan o`ris muallim bor edi.
U meni savolga tutishni yaxshi ko`rardi. U o`rischalab gapirar, men uning nima deyayotganini fahmlab, javob berardim.
"Kanada kommunistik partiyasining raisi kim?” “Uilyam Kashtan”. “Indoneziya prezidenti kim?". "Doktor Sukar- no"... U har bir javobimdan quvonar, meni o`zicha nimalardir maktagan bo`lar edi.d
Bir yozning issig`ida u rayon markazidan hovlimizga ancha yo`lni bosib keldi. Domlaning Boysunda ishlash muddati tugab, Rossiyaga qaytib ketayotgan ekan.
Men bilan xayrlashgani kelibdi,
Domla menga o`qishim kerakligini qayta-qayta tayinladi.
“Bolshim chelovekom budesh”, dedi u.
Bu juda ta`sirli edi. Onam ko`ziga yosh oldi.
Farida Afro`z, shoira, deputat
Men besh yarim yoshimda maktabga borganman. Maktabda yaxshi o`qiganman. Harflarni opam bilan o`rganganman. Opamga maktab formasi olib berishganda, menga ham deb yig`lagan ekanman. Shunaqa erkagina bo`lganman.
Birinchi sinf o`qituvchimiz qattiqqo`l, badjahl ayol edilar. Sinfdoshlarimga yordam beraman deb ko`p dakki eshitardim. Diktantlar, insholar yozilganda ko`chirishga berardim.
Hamza Jumaev, jurnalist
Maktabda o`qituvchisidan dakki eshitmagan o`quvchi bo`lmasa kerak. O`qituvchilar dakki berganda bolani yomon ko`rganidan emas, balki yaxshiligi uchun dakki berishadi.Birinchi muallimim bilan shirin xotiralarim bor. O`g`iloy opa Ro`zieva, ular maktabga yaqin yashar edilar. Shu ustozim uylariga ko`p borardim.
Nozima Vohidova, jurnalist
Maktabda yaxshi o`qiganman. Shuning uchun ham ko`p dakki eshitmaganman. Lekin injiq, erkatoy edim. Onam ham o`qituvchi bo`lganlar. Gap eshitsam onamdan eshitardim.
Maktabimiz qishlog`imizdan uzoq edi. Agar qo`limdan ushlab olib bormasalar, so`mkamni ustiga o`tirib olardim.
Birinchi sinfda 26 ta o`quvchi bo`lganmiz. Sharofiddin Kenjaev degan ustozimiz bo`lgan. Ustozimizni qiynagan vaqtlarimiz ko`p bo`lgan. Hammamiz bilan sabr qilib gaplashishga kuch topganlar. Ana shunday ustozni qo`lida tahsil olganimdan xursandman.
Valijon Shamshiev, so`z ustasi
Deyarli 10 yilni ichida ustozlarimdan kaltak emagan ekanman. Chunki har bitta darsda tayyor turardim.
Men maktabda farroshni farzandi bo`lganman. Bog`chaga bormaganman, lekin maktabga 5 yoshimdan chiqqanman. Menga alifboni opalarim o`rgatishgan. Maktabga boraman deb, opamni so`mkasini ko`tarib borvolganman.
Yoshing kichkina deb maktabga olishmagan. Onam direktorni oldirlariga olib kirganlar. Direktor alifboni o`qitib ko`rib, meni maktabga qabul qilgan. Hamma sentyabrdan boshlasa men yanvardan boshlaganman.
Shuhrat Azimov, aktyor
Men o`zim Oltiariqda tug`ilganman. Yaqinda birinchi ustozimni ko`rgani borgandim, afsuski o`tib ketgan ekan.
Men maktab davrida qo`y og`zidan cho`p olmaganman, lekin tishini sug`irib olardim (kuladi). Juda sho`x bo`lganman. Bolaligimni eslasam qo`rqib ketaman.
Erkin Jo`liev, so`z ustasi
Bizni birinchi sinfda 75 yoshli Ulash bobo o`qitgan. Bolalikda juda sho`x bo`lmaganmiz. Namunali o`quvchi edik.
Yoshligimdan san`atga qiziqish bo`lgan. “Toshkentga sayohat” degan spektakl bo`lardi. O`sha spektaklda maktabda boy rolini menga topshirishdi. Sahnaga yugurib chiqib ketganman. Hamma kulgan. Yaxshi o`ynayapman deb o`ylaganman. Keyin bilsam yalangoyoq chiqqanim uchun kulishgan ekan.
Karim ZARIPOV tayyorladi
