Davlat xavfsizlik xizmatining Andijon viloyati bo`yicha boshqarmasi xodimlari tomonidan viloyat Bojxona boshqarmasi hamda Iqtisodiy jinoyatlarga qarshi kurashish departamenti bilan hamkorlikda o`tkazilgan tezkor tadbirlar natijasida, sifati kafolatlanmagan hamda qalbaki tibbiyot dori vositalarining noqonuniy aylanmasiga chek qo`yildi. Bu haqda DXX Matbuot xizmati xabar bermoqda.
Xususan, Oltinko`l tumanida yashovchi, 1987 y.t. fuqaro boshqaruvidagi “BYD” rusumli avtomashina Andijon shahridagi “Yangibozor” savdo majmuasi oldida to`xtatilib, ko`zdan kechirilganda, uning yukxonasida tegishli hujjatlari bo`lmagan 171 quti “Ferrouz” nomli dori vositalari borligi aniqlanib, tegishli tartibda rasmiylashtirib olindi.
Tezkor tadbir davom ettirilib, ushbu shaxsning yashash xonadonida jami 5593 qutida 8 xil turdagi qalbaki dori vositalari va ularni qadoqlashda foydalaniladigan bo`sh qutilar, turli xildagi dori vositalarining yo`riqnoma va yorliqlari borligi ma`lum bo`ldi.
Shuningdek, mazkur noqonuniy ishga aloqador bo`lgan 3 nafar fuqaroning yashash xonadonlari hamda ularga tegishli bo`lgan manzillarda ham ko`p miqdordagi qalbaki dori vositalari borligi aniqlandi.
Olib borilgan tezkor-tintuv tadbirlari natijasida umumiy qiymati 700 mln. so`mdan ortiq bo`lgan, jami 14 turdagi 10686 dona dori vositalari tegishli tartibda rasmiylashtirib olindi.
Mazkur shaxslar o`zaro kelishgan holda yashash xonadonlarida qalbaki dori vositalarini tayyorlab, kelgusida sotish maqsadida Andijon shahridagi tug`ruqxonalar, shifoxonalar, xususiy klinikalar hamda Samarqand, Buxoro, Xorazm, Qashqadaryo, Surxondaryo, Farg`ona viloyatlari va Toshkent shahriga etkazib berishgan.
Ko`rilgan chora-tadbirlar natijasida 5000 qutidan ortiq qalbaki dori vositalari qaytarib olinib, aholi orasida tarqalishining oldi olindi.
Boshqa holatda esa Andijon shahrida yashovchi, 1990 y.t. fuqaro sifati kafolatlanmagan va tegishli hujjatlari bo`lmagan dori vositalarini Andijon va Qashqadaryo viloyatlaridagi dorixonalarga yuborayotgan vaqtida qo`lga olindi.
Shuningdek, ushbu shaxsning yashash xonadonida o`rnatilgan talablar darajasida saqlanmayotgan, umumiy qiymati 250 mln. so`m bo`lgan 5000 dona sifati kafolatlanmagan dori vositalari hamda qadoqlashda foydalaniladigan bo`sh qutilar, turli xildagi dori vositalarining yo`riqnoma va yorliqlari borligi ma`lum bo`ldi va tegishli tartibda rasmiylashtirib olindi.
Hozirda har ikki holat yuzasidan mazkur shaxslarga nisbatan Jinoyat Kodeksining 186 prim 3-moddasi bilan jinoyat ishlari qo`zg`atilib, qamoqqa olish tarzidagi ehtiyot chorasi qo`llanilgan.
