Hukumat qarori bilan “Yosh chegarachilar” harbiy-akademik liseyiga o`quvchilarni saralab olish tartibi takomillashtirildi.
“Yosh chegarachilar” harbiy-akademik liseyiga umumta`lim va ixtisoslashtirilgan maktab-internat maktablarining 9-sinfini tamomlaganlik to`g`risidagi shahodatnomaga ega, sog`lig`ining holatiga ko`ra o`qishga yaroqli deb topilgan hamda haqqoniy va shaffoflik tamoyillariga asoslangan saralash tadbirlaridan muvaffaqiyatli o`tgan O`zbekiston Respublikasining erkak jinsli fuqarolari o`qishga qabul qilinadi.
Saralash tadbirlari dastlabki tanlov, harbiy-kasbiy tanlov va test sinovlaridan iborat.
Nomzodlar uchun dastlabki tanlov ularning yashash va o`qish joyi bo`yicha Chegara qo`shinlari, DXX hududiy boshqarmalarining bo`linmalari, tuman va shahar bo`linmalari (bo`limlari) tomonidan “Yosh chegarachilar” harbiy-akademik liseyi mas`ul xodimlari bilan birgalikda o`tkaziladi.
9-sinf o`quvchilaridan 5 sentyabrdan 5 oktyabrga qadar arizalar qabul qilinib, Chegara qo`shinlari harbiy qismlarining shaxsiy tarkib bilan ishlash bo`linmalariga taqdim etiladi.
Harbiy-kasbiy tanlov 5 oktyabrdan 1 fevralga qadar o`tkaziladi. Bunda nomzodning:
- tegishli hujjatlari va tavsiflovchi ma`lumotlari o`rganiladi;
- tibbiy ko`rikdan o`tkaziladi;
- psixofiziologik xususiyatlarini aniqlanadi;
- jismoniy tayyorgarlik darajasini aniqlanadi;
- ️ savodxonlik darajasini baholanadi (ijodiy bayon olinadi);
DXX harbiy xizmatchilari uchun belgilangan maxsus talablarga mos kelishini aniqlanadi;
Yakka tartibda yakuniy suhbat o`tkaziladi va uni test sinovlariga qo`yish to`g`risida yakuniy qaror qabul qilinadi.
Test sinovlari:
- Bilim va malakalarni baholash agentligi tomonidan o`tkaziladi;
- umumta`lim fanlari bloki davlat komissiyasi tomonidan tasdiqlanadi;
- nomzodlar o`z ixtiyoriga ko`ra uch tildan — o`zbek, qoraqalpoq va rus tillaridan birida topshiradilar.
Quyidagi nomzodlar liseyga test sinovlarisiz tanlovdan tashqari o`qishga qabul qilinadi:
- xalqaro va respublika fan olimpiadalarining g`oliblari — belgilangan qabul kvotasi doirasida;
- o`z xizmat vazifalarini bajarish chog`ida halok bo`lgan hamda jarohatlanish (shikastlanish) natijasida nogiron bo`lib qolgan harbiy xizmatchilarning farzandlari — kvotadan tashqari;
- etim, ota-ona qarovisiz qolgan, davlat va jamiyat yordamiga muhtoj bo`lgan, joriy yilda maktabning 9-sinfini tamomlagan voyaga etmagan yoshlar bilan ishlash bo`yicha hududiy idoralararo komissiya tavsiyasi hamda DXX rahbariyatining qarorlari asosida — kvotadan tashqari belgilangan kvotaning 5 foizidan ko`p bo`lmagan miqdorda.
