Bir necha oydan beri o`zining shiddatli bahsi va g`alabalari bilan muxlislarni xursand qilib kelayotgan Toshkentning “Humo” xokkey jamoasi muntazam chempionat doirasidagi so`ngi bahsda muzga chiqdi. Chempionatning pley-off bosqichini muddatidan avval hal qilib qo`ygan qanotlilarning navbatdagi raqibi Qozog`istonning “Aktobe” jamoasi bo`ldi.
5087 nafar tomoshabin ishtirokida kechgan bellashuv tomonlarning o`zaro 5 chi qarama-qarshiligi bo`lib, bunga qadar jamoalari 9 ta o`yin o`tkazgan, ularning 6 tasida vakillarimiz, 3 tasida esa “Aktobe” xokkeychilarining qo`li baland kelgan. Galdagi uchrashuv ham raqiblar foydasiga hal bo`ldi. 1:2 hisobidagi natija “Aktobe”ning g`alabalari sonini yana bittaga oshirib qo`ydi. Biroq bu “Humo”ning natijasiga ta`sir ko`rsata olmadi. Chunki, ushbu o`yinga qadar turnir jadvalida “qanotlilar” ikkinchi o`rin bilan pley off masalasini allaqachon hal qilib qo`ygan edi.
O`yindan so`ng arenada “Mishkopad” ya`ni yumshoq o`yinchoqlar uloqtirish marosimi ham bo`lib o`tdi.
“Humo” xokkey klubi matbuot xizmatining bergan ma`lumotiga ko`ra, shu kuni muz ustidan muxlislar tomonidan uloqtirilgan 1300 dan ziyod yumshoq o`yinchoqlar yig`ib olingan. Eslatib o`tamiz ushbu o`yinchoqlar “Ishonch” fondiga taqdim etiladi.
Oybek Shukurov
