Parlament quyi palatasi deputati Muqaddas Tirkasheva suv xo`jaligi vaziri Sh.Hamroevning axboroti eshituvida asosiy daryolarimizga suv kelish prognozlari bilan qiziqdi.
Vazirning so`zlariga ko`ra, bu yilgi yog`ingarchiliklar natijasida Amudaryo va Sirdaryo daryolarida suv hajmi yaxshi bo`lishi bashorat qilinyapti. Hozirgi holatda o`tgan yilgi daraja kutilyapti. Ko`p yillik me`yorlarga nisbatan esa Sirdaryoda 85-90 foiz, Amudaryoda 90-95 foizgacha suv bo`lishi bashorat qilinmoqda. Bugungi kunda suv omborlarida o`tgan yilga nisbatan 1,5 milliard kub ortiqcha suv zaxirasi yaratilgan.
Shuningdek, vazir so`nggi yillardagi ochiqlik siyosati natijasida qo`shni davlatlar bilan ko`p masalalarda, jumladan, suv masalasida ham yaqin hamkorlikda ishlar olib borilayotganini ta`kidladi.
