Buxoroda mashinadan tanasini chiqarib doira chalgan fuqaro va haydovchiga nisbatan qonuniy chora ko‘rildi. Holat yuzasidan Buxoro YHXB matbuot xizmati ma’lumot berdi.
Qayd etilishicha, fuqaro Lacetti rusumli, 80Q717NA davlat raqam belgili avtomobil transport vositasining oynasidan tana qismini chiqarib, doira chalgan. Ushbu holat aks etgan video esa ijtimoiy tarmoqlarda keng muhokamalarga sabab bo‘ldi.
"Lacetti mashinasi meni nomimda. 2 avgust to‘y edi. To‘yda doirachi mashinadan tana qismini chiqarishiga men o‘zim sharoit yaratib berdim. Qilgan ishimdan afsusdaman. Boshqa qaytarilmaydi", — dedi mashina haydovchisi.
Ma’lumotlarga ko‘ra, Buxoro viloyati IIB JXX YHXB xodimlari tomonidan holat o‘rganilib, avtomobil haydovchisi va yo‘lovchisiga nisbatan belgilangan tartibda ma’muriy bayonnomalar rasmiylashtirilgan.
