O‘zbekistonda aholini ro‘yxatga olish 2026 yil 15 iyuldan 21 avgustga qadar o‘tkazilishi mumkin
Huquqshunos Xushnud Xudoyberdiyevning ma’lum qilishicha, bu boradagi Prezident farmoni loyihasi jamoatchilik muhokamasiga qo‘yildi.
Unga ko‘ra:
➖ aholini ro‘yxatga olishni o‘tkazishga ko‘maklashish bo‘yicha hududiy komissiyalar tuzilishi;
➖ Statistika agentligi aholini ro‘yxatga olishni planshet qurilmalari yordamida o‘tkazish uchun 2024–2026 yillarda zarur texnik va dasturiy vositalarni Jahon bankining imtiyozli kredit mablag‘lari hisobidan belgilangan tartibda xarid qilish ishlarini tashkil etishi;
➖ Kadastr agentligi 2025 yil 1 iyulga qadar aholi punktlari va ko‘chalar nom belgilarini o‘rnatish, xonadon va uylarni to‘liq raqamlash ishlarini yakuniga yetkazilishini ta’minlashi;
➖ mahalliy hokimliklar 2025-yil 1-sentyabrga qadar hududlarning ma’muriy-hududiy birliklari chegaralarining o‘zgarishi, toponomik obektlarga nom berilishi va ularning nomlari o‘zgarishi bo‘yicha tegishli ma’lumotlarni hududiy statistika organlariga o‘z vaqtida taqdim etib borilishini ta’minlashi;
➖ Kadastr agentligi 2025 yil 1 noyabrga qadar aholini ro‘yxatga olish uchun zarur bo‘lgan miqdorda kartografik materiallar (shahar va qishloq aholi punktlarining yangilangan sxematik rejalari va xaritalari) bilan to‘liq ta’minlashi lozimligi belgilab qo‘yilmoqda.
Shuningdek, Oliy Majlis palatalariga 2025 yil 1 sentyabrdan 2026 yil 1 sentyabrga qadar respublika bo‘ylab ma’muriy-hududiy birliklarning chegaralarini o‘zgartirish, toponomik obektlarga nom berish va ularning nomlarini o‘zgartirish ishlarini vaqtincha to‘xtatib turish tavsiya etilmoqda.
