Ўзбекистонда аҳолини рўйхатга олиш 2026 йил 15 июлдан 21 августга қадар ўтказилиши мумкин
Ҳуқуқшунос Хушнуд Худойбердиевнинг маълум қилишича, бу борадаги Президент фармони лойиҳаси жамоатчилик муҳокамасига қўйилди.
Унга кўра:
➖ аҳолини рўйхатга олишни ўтказишга кўмаклашиш бўйича ҳудудий комиссиялар тузилиши;
➖ Статистика агентлиги аҳолини рўйхатга олишни планшет қурилмалари ёрдамида ўтказиш учун 2024–2026 йилларда зарур техник ва дастурий воситаларни Жаҳон банкининг имтиёзли кредит маблағлари ҳисобидан белгиланган тартибда харид қилиш ишларини ташкил этиши;
➖ Кадастр агентлиги 2025 йил 1 июлга қадар аҳоли пунктлари ва кўчалар ном белгиларини ўрнатиш, хонадон ва уйларни тўлиқ рақамлаш ишларини якунига етказилишини таъминлаши;
➖ маҳаллий ҳокимликлар 2025-йил 1-сентябрга қадар ҳудудларнинг маъмурий-ҳудудий бирликлари чегараларининг ўзгариши, топономик обектларга ном берилиши ва уларнинг номлари ўзгариши бўйича тегишли маълумотларни ҳудудий статистика органларига ўз вақтида тақдим этиб борилишини таъминлаши;
➖ Кадастр агентлиги 2025 йил 1 ноябрга қадар аҳолини рўйхатга олиш учун зарур бўлган миқдорда картографик материаллар (шаҳар ва қишлоқ аҳоли пунктларининг янгиланган схематик режалари ва хариталари) билан тўлиқ таъминлаши лозимлиги белгилаб қўйилмоқда.
Шунингдек, Олий Мажлис палаталарига 2025 йил 1 сентябрдан 2026 йил 1 сентябрга қадар республика бўйлаб маъмурий-ҳудудий бирликларнинг чегараларини ўзгартириш, топономик обектларга ном бериш ва уларнинг номларини ўзгартириш ишларини вақтинча тўхтатиб туриш тавсия этилмоқда.
