Bugun, 8 noyabr kuni poytaxtimizda joylashgan Abu Ali Ibn Sino nomidagi ixtisoslashtirilgan maktabda maktabgacha va maktab ta’limi vazirligi tomonidan tashkillashtirilgan Xalqaro fan olimpiadalarida g‘oliblikni qo‘lga kiritgan o‘quvchilar va ularning ustozlarini taqdirlash marosimi bo‘lib o‘tdi.
Tadbir buyuk siymolarimizni gavdalantirgan sahna ko‘rinishi bilan boshlandi. Taqdirlash marosimini maktabgacha va maktab ta’limi vaziri Hilola Umarova g‘oliblarga o‘zining samimiy tilaklarini bildirgan holda ochib berdi. 2023-2024 o‘quv yilida maktab o‘quvchilari tomonidan xalqaro fan olimpiadalarida jami 122 ta medal qo‘lga kiritilganligi ta’kidlab o‘tildi va ushbu natija hozirga qadar eng yuqori ko‘rsatkich hisoblanadi.
Tadbir davomida Buyuk Britaniya, Saudiya Arabistoni, Misr, Qozog‘iston, Hindiston va boshqa ko‘plab dunyoning rivojlangan mamlakatlarida kimyo matematika, nemis tili, informatika fanlaridan xalqaro fan olimpiadalarda qatnashib bronza, kumush, oltin medallarni qo‘lga kiritgan yoshlar taqdirlandi.
Shuningdek, tadbirda Jinisbek Piyazov va Ko‘k choy guruhi tomonidan kuy-taronalar kuylandi. Bundan tashqari eng nufuzli xalqaro olimpiada g‘oliblariga axborot texnologiyalari va kommunikatsiyalarini rivojlantirish vaziri Sherzod Shermatov hamda Maktabgacha va maktab ta’limi vaziri Hilola Umarova eng yuqori 3 ta o‘rin uchun oltin medal sohibiga 187,5 mln o‘qituvchisiga 168, 75 mln, kumush medali g‘olibiga 112,5 mln o‘qituvchisiga 112,5 mln, uchinchi o‘rin bronza medali sohibiga 75 mln, o‘qituvchisiga 56, 25 mln so‘m pul mukofotlari topshirildi.
Taqdirlash marosimida Maktabgacha va maktab ta’limi vaziri Hilola Umarova, Axborot texnologiyalari va kommunikatsiyalarini rivojlantirish vaziri Sherzod Shermatov, xalqaro olimpiada g‘oliblari, ustozlar, ota onalar, ommaviy axborot vositalari vakillari, blogerlar ishtirok etishdi.
G‘oliblar orasida Germaniyada o‘tkazilgan Xalqaro nemis tili olimpiadasida oltin medalni qo‘lga kiritgan Ibrohimova Rayyona ham bor.
"Bu tanlovda birinchi o‘rinni olishim shart edi. Chunki O‘zbekiston bu olimpiadaga 2012 yildan beri a’zo bo‘lib qatnashib kelayotgan bo‘lsa hali g‘oliblikni qo‘lga kiritmagan edi. Hattoki safar davomida ham tayyorlanganimiz o‘z mevasini berdi. Yurtboshimizga ham o‘z minnatdorchiligimni bildiraman bizni taqdirlab e’tibor va e’tirof etayotganlari uchun"- deydi Rayyona Ibrohimova.
