Kecha, 24 noyabr kuni Qashqadaryo viloyati Kitob tumanida erkak turmush o‘rtog‘i va deyarli 3 oylik chaqalog‘ini o‘ldirib, so‘ng o‘z joniga qasd qildi. Bu haqda Bosh prokuratura matbuot kotibi ma’lum qildi.
1998 yilda tug‘ilgan erkak kecha, 24 noyabr kuni soat 13:00 larda ruhiyatida sodir bo‘lgan o‘zgarishlar okibatida 1996 yilda tug‘ilgan turmush o‘rtog‘i hamda joriy yilning 1 sentyabr kuni tug‘ilgan qizini oshxona pichog‘i bilan o‘ldirgan. So‘ng arqondan sirtmoq yasab, o‘zini osib joniga qasd qilgan.
Mazkur holat yuzasidan kecha, 24 noyabr kuni Kitob tumani prokurori tomonidan Jinoyat kodeksining 97-moddasi (Qasddan odam o‘ldirish) bilan jinoyat ishi qo‘zg‘atilgan.
Ma’lumot uchun, gumonlanuvchi shaxs (marhum) 2006 yildan buyon viloyat ruhiy asab kasalliklari shifoxonasida ro‘yxatda turgan.
